فى حب المشاركة

النهاردة الجو بديع بصورة غير ممكنة بشكل مبكي من الجمال الهوا الساقع إلل بيدخل تحس روحك بتتنفس جواك ..
وتجري فيك رقص وزغزغة ..
جريت صليت الفجر وقبل ما الدنيا تنور العصافير بتصلي وتنده على المولى بصوت غُنى ..
أنا وقطتي ع السور .. الجو ده بيفكرني بحاجة يترى إيه ؟! مهما أجتهد للوصول لها مش فاكرة ولكني قربت شوية .. بلكونتي وفى قول آخر فرنده فى الفندق إللي باصص على النيل من الدور التالت نيل الأقصر وصافير بتجري جري ع السحاب ومنطاض ملون بين سحابة قريبة .. وأصابني إللي أصابني وقتها حزن عميق ..
لأن الجو ده ساعتها كنت فيه لوحدي مكنش في الشخص الصح إللي أصحيه يشاركني المنظر البديع ده .. ولك أن تتخيل لما تصحي حد تعبان الساعة خمسة ونص هيعمل فيك إيه لما تقوله قوم بص على السما ولا على الشمس وهي بتتولد هيشلفط وشك !

طااايب بالرغم من كوني شخص إنطوائي وبميل للعزله التامة مع إني أبدو شخص إجتماعي جدا و عسول :D وفى المجمل أنا شخص مغفل وعبيط ما علينا ما علينا .. أنا بعشق المشاركة لدرجة الهوس تقريباً أحكيلكوا ..

ممكن جداً أخرج من حفلة عشان خاليه من حد معين عيزاه هو لوحده يشاركني اللحظه دي آه طبعاً الله يعوض عليا ف تمن التذاكر
ممكن جداً أقفل فيلم عظيم قعدت أستنيته كتير يجي أو حتى أخرج من السينما عشان محدش معايا ..
ممكن أستنى وأشيل رواية جبتها وقريت منها 100 صفحة عشان مستنية حد بعينه يقراها معايا ..
ممكن جداً أسيب مسرحية الناس هتموت عليها وأتبرع بالتيكت لأي حد من الواقفين عشان أتهبب أدخلها مع أصحابي ..

عارف اللحظة إللي بتكون قاعد بتتفرج فيها على فيلم فيه حتة خبث وذكاء كده تكون أنت فهمتها فبتبص للي قاعد جنبك يقوم هو كمان باصصلك بإنه يابن اللزينه أنا كمان فهمت أهي اللحظة دي بالفيلم كله ..
المشاركة إللي هي كمان لما تكون فى الفيلم حتة بتضحك أوي فتقوم خابط إللي جنبك على رجلة وتقوموا ميتين سوا من الضحك طب ونابي إيه فايدة الضحك لو هتضحكه لوحدك ها ها ها ؟؟!

طب عارف لما تبقا فى حفلة وتيجي كلمة من أغنية تلمسك إنت وصاحبك تقوم ماسك إيده وتحط راسك على كتفه وتدمع أو لما تكون أغنيتكوا المفضلة أهي اللحظة دي بالحفلة وبال بيغنوا ..
أصلاً مش بروح الحفالات عشان إللي بيغنوا ما أنا بسمعهم ببلاش فى البيت مش نتانة بس معانديش الشغف إتجاه المغنين أو الكتاب أو الممثلن أي بلا بلا  أنا بروح حسب الناس إللي هتروح أصحابي قرايبي بلا بلا بلا :D
بالمناسبة كان في حفلة لوسط البلد حاولت أستمتع بيها جداً جداً لكن للأسف خرجت أجري عشان هبة مش معايا الكلام ده "شمس النهار هاتجيني هتغني وتصحيني" محتاج هبة ومحتاج كل أحلامنا "مع أول شوق هروق وأشوف حاجات كتير ما شفتش زيها" .. هي فين هبة ؟! آه طيب ما علنا ما علينا !!

عامة أنا بروح السينما فعلياً عشان أنام وكتير مش بنتبه عن عمد للفيلم لو حلو أوي عشان أشاركه مع الحد إللي الله أعلم هيكون مين وإللي أستنيت يكون البست فريندايا ذا وان أند أونلي ولكن ما علينا ما علينا .. أنا مش بدخل السينيما وحيداً شريداً ولكن أحياناً المشاركة مع الصحاب مش بتؤدي الغرض فبنام فعلياً ..

طب عارف ف كام كلمة فى الكتاب إللي بتقراه بيقولك إنت أهو بين السطور حركاتك كلامك معتقداتك وصف شخص بتحبه حاجة بتحبها أو كلام بديع بتقول لنفسك هو إتكتب إزاي إيه الدماغ دي!! ، بتقفل وتحس إحساس عظيم لا يصح معه إلا المشاركة مع الحد إللي هتريح راسك عل كتفه وتسمع الكلمات دي بصوته وتبقا الكلمات أو النص ده تميمتكوا طول العمر سر على صغره عظيم .. وبيبقا إللي كاتب الكتاب ده إللي ممكن يكون مالوش لازمه كاتبكم المفضل .. 

المشاركة شئ عظيم عظيم عظيم هي الذكريات إللي بتخلي الأشخاص يغدوا مميزين ومخصوصين بالنسبة لينا ..
الحياة حلوة طول ما إحنا إتنين ممكن مانكنش قريبين أوي بس لكل شخص مناسبة ومشاركة تليق بالحاجات إللي إنتوا فيها لايقين على بعض وفيكوا من بعض ..
فلكل شخص حاجة معينة بتعملها معاه فلان نشاركة الماتش ، فلانة القهوة الصباحية ، فلان شراء الهدوم ، فلانة الموصلات ، فلان لعب بلايستيشن ، فلانة السينيما ، ماما الكلام عن بابا وبابا الكلام عن ماما أو زمان ، فلان نشاركة مخاوفنا ، فلانة نشاركها أحزانا وهكذا ...
 
فلنتخيل بقا لما نلاقي شخص يكون شبهنا فى كل حاجة أكيد ده نحب نشارك معاه حيتنا كلها شخص بالعمر كله من وجه نظري العقيمة هتكون الحياة أحلى وأكثر إمتاعاً وأكيد هنجادل بعض لما نطهق بس عمرنا ما نزهق .. آه بحب الجدل والمناقشات :S

اللحظة بتاعت الفجر النهاردة كانت عظيمة وزعلت إني مشاركتهاش مع حد غير عبود قطي الصغنطوط وصوت غالية بن علي إللي سحرني صوتها الغجري إبن اللزينة وأنا بكتب الهتش ده والنور بيطلع بالتدريج وهي تقول "يلا نعيش بعيون الليل" إزاي غنتيها أحل من الست ها؟! ..
المهم أدركت إني وعبود متشابهين ف عشق الفجر وتسبيح العصافير عبود عنده فضول طفولي قاتل إتجاه العصافير ونور الصباح بشاركة فى ده .. كل يوم يقعد فى صبر وإندهاش حقيقي بيراقبهم وأنا براقب إندهاشه وما أخدتش بالي غير النهاردة إني بعمل نفس إللي بيعمله هاااااح ..

المشاركة نوع من أنواع الحب .. وحقيقي أخدت بالي وزعلت مني إني فى عزله بقالي كتير وبالرغم من قبح الناس وإنهم بياخدوا منك روحك ويساهموا ف تكسيرها وبيبعدونا عن ربنا وقليل إللي بجد بيساعدك تروحله .. إلا إني مفتقده إني أشارك حياتي مع الناس ..
يتهيألي الحياة متبقاش حياة غير لما نشاركها مع الناس التانين .. متى أصبحت وحيدة كده ؟ ومتى أصبح الفؤاد خالي كده ؟!

ما علينا ما علينا الجو النهاردة حلو شاركوا الجو النهاردة مع حبايبكوا عوضوني عن وحدتي النهاردة بإنكوا تكونوا جنب بعض الحياة قصيرة أوي عشان نعيش بعيد عن إللي بنحبهم ولا نشاركها معاهم .. ولو ما فيش حد شاركوا الجو بكتاب بقطتكوا بكلابكوا بأكله حلوة أو فيلم حلو شوية صلاة شوية تسبيح ..
الحياة قصيرة ساعة وهنصحى نلاقي اللي باقي منها شوية ذكرايات عايزين نشاركها فوق بقا :D
"وهو العمر إيه غير ليلة ؟!" :")

كـأنك تـراه ..

أعـبـد الله كــأنـك تـراه .. فإن لـم تـكـن تـراه فـهـو يـراك 

اللحظات النادرة إللي بتثبت وجود ربنا جوه نفسك بتجلياته فى نفسك .. إنتَ مؤمن بس زيادة على الإيمان إيمان .. اللحظات إللي بترضى فيها وتأمن الموت وبتتمناه إشتياقاً لواسع حضن ربنـا .. إللي بتكون دايقه فى اللحظة دي بالذات .. 
اللحظة إللي إيمانك بيه وبأسمائه وبغفرانه ووجوده إنـه هيغفرلك ما مضى وما هو آت  ..

أعـبـد الله كــأنـك تـراه .. فإن لـم تـكـن تـراه فـهـو يـراك 

دلوقتي بس فى اللحظة دي دون غيرها من لحظات قرب منه .. مش فارق معاك نار ولا جنة المهم كل المهم تقعد معاه .. تشوفه زي ما إنت شايفه دلوقت .. شايفه من غير شوف .. 
اللحظة دي بكـل إللي فات من عمرك وبكل إللي جاي 
اللحظة دي بكل همك وحزنك وزعلك اللحظة دي بتقول فيها طظ فى قلبي المكسور إللي بقا مجبور وإتصلح وإتبدل بقلب جديد خالي من الوجع والهم بس مش خالي من حب ربنا ولكن فى زيادة ويقين .. 
اللحظة دي بكل الدنيا بكل أهلها بكل شهواتك فى التفكير فى حبيب من أهل الدنيا وحاله والخوف عليه وشيل همه .. اللحظة دي بكل إللي بتحبه بأحب من إللي بتحبه اللحظة دي بتذهب نفسك عن نفسك ..

أعـــبــد الله كـأنـك تــراه ..

فإن لم تكن تراه ..
فى اللحظة دي إنت سامع صوته من جواك بصوتك من وسط آيات منورة بترقص قدامك بلطيف كلامه ..
شايف نور منه فى إيـد قطتك، فى إنعكاس ضيه فى عيون كلبك، فى سبح وتسبيح العصافير فى الفلك من فوقك ..

فإن لم تـكـن تـراه ..
قلبك قاسي إطحنه محبه دور بقلبك على حانات الحبايب إسقيه من كل الكاسات فى كاس نبيذ محبة خالصه أكيد أكيد لايق بقدر القسوة فيك يقدر يلينها يزلزل قلبك ، نبيذ من أسماءه من آياته من الصدقات من العبادات لك كأس معاه يلين قلبك تشوفه به ..
دور بقلبك على حانات العشق لك كاس لك كاس لك كاس .. ماتفوتش كاسك ولا سكرك به !

فإن لم تكن تراه ..
عشان نفسك قادرة عليك إعبده بيقين حتى يأتيك اليقين .. فإن لم تكن تراه فهو يراك إعبده بما يليق به ويليق بحبك له ومترضاش لحبك يكون ناقص ولا متسرع وغير متأني وغير صادق .. 

أعــبـد الله كـأنـك تـراه ..

اللحظة دي بالأخص عايزة أمـوت فيها بكل ثقة مبتسمة ببكائي وراضيه عنه ، عن كل إللي جالي منه عن اللحظة دي .. راضيه وممتنة لربنا الحبيب عـن إنـه فطرني على الإيمن به مما لا يدع لقلبي شك فى إنـه موجود ولا إني أدُور أدَور على غـيره .. نعمة الإيمان به فطرة جوه قلبك بتدفعك دفع نحوه بيقولك بيها جوه قلبك بصوته أنـا موجود .. أنـا هنـا .. أنا موجود .. وجودي أوجد كل شئ أوجدك أوجد قلبك .. أنا موجود عشان كده إنت موجود .. من دوني مافيش للوجود وجود لا موجودات بلا واجد وأنا الواجد .. لا أشياء ولا أحباء لا أشياء ولا أحباء ..
بيزود عندي الإشفاق على إللي مش مؤمنين بوجود رب مع أول خصاره حبيب بيموتوا وراهم لا هدف ولا حياة .. بينما إللي بيموت من الحبايب حي عند الحي موجود عند الواجد الموجود .. الحبايب عند الحبيب قلبك مطمن على إللي راح عشان مارحش .. ما عند الله باقٍ
 
أعبد الله كأنك تراه ..

بتتعجب فى اللحظة دي من أصحابك إللي مش شايفينه إللي مش مأمنين بوجوده وحبه مع إنه ظاهر فى كل لحظه وكل قلب وكل عين ظاهر حتى فى العصاه والمتكبرين المتجبرين .. وبتدعيلهم من قلبك بتتمناه يشوفوا زي ما إنت شايفه يدوقوا الطعم إللي إنت دايقه فى قلبك دلوقت ..
اللحظة دي بتطحنك بتدوبك وبتخلي قلبك خالي من أي غضب من أي غل لأي حد .. بتخليك مسامح بتشيل الحزن والهم والغيرة بتصفي قلبك لحب صافي من مصدره نور من أنوار .. بتسامح ف سوء الظن بتسامح فى الوجع والسهر .. بتبقا إنت من غير نفس ..

أعـبـد الله كـأنك تـراه ..

اللحظة إللي بتخاف تخلص وترجع لحالك القديم تايه فى دنيا من نفسك إللي بتذلك وبتدعي القادر يقدرك تقدر عليها ..
اللحظة إللي بتفضل تدعي فيها اللهم يا مقلب القلوب لا تقلب قلبي فى حب غيرك ، ثبت قلبك على حبك ويقينك .. أقبض روحي دلوقتي ودلوقتي بالذات وسط دموع الشوق والزعل على لحظات القرب إللي ضاعت فى العمر إللي فات على نفسي فى اللاشئ فى معرفة ولا شئ ولا ناس .. 
خدني عندك أخذ جميل رد روحي إليك أنتشلني مني عندك فى الرضا ده ..

أعـبـد الله كـأنـك تـراه ..

اللحظة دي بيتجدد إيماني إنـه أشهد أن لا إله إلا أنت سبحانك إني كنت من التائهين العاصيين المتخبطين الخائبين وإن النبي خير رسول بعته للعالمين .. وإني من التائبين لك شاهدين مُسبحين قائمين باكيين بقلوب مفطوره من الشوق لك والعجب من الود إللي بتتودده لنفس عاصيه متكبره أبيه حقيرة !!

اللحظة دي كل الكلام إللي مؤمنه به بيزيد يقين وقوه بإنه الله أكبر من الحزن الله أكبر من الزعل الله أكبر من كل حاجة مخوفاني الله أكبر من أحلامي الله أكبر من حبايبي والله أكبر من المستقبل والله أكبر من كل خوف وكل جبار الله هـــو الأكبر والأقدر ..

اللحظة دي حبي بيزيد حب على حب وبيعرفني إنك فى المحبة سابق وإني برغم صغري وحقارتي وتفاهتي حبيبتك وأنا فى إيدك وراضيه عنك وإنت راضيني اللحظة دي بكل عمري ولحظاتي وأحلامي .. 
ولأني راضية ولازم أرضى عنك ماينفعش أقولك أقبضني فيها لأن فى العمر باقيه بس أقولك كتر من اللحظات دي وخليني جنبك وإرضيني بك وإكفيني بك .. راضيه عنك ..

فــإن لـم تــكــــن تـــراه فــهــو يــراك ...