بداخــلهــا طــفـلة : )

ترن ترن ألو مرحباً

والله بحبك موووت يا حمادة أنا بعدك إنت أموت يا حمادة

بابا بابا بابا أوبــح

ــــــــــــــــــــــــــــــــــــــ

تليفوني الخاص فــ سنتي السابعة لوجودي على الأرض كنت مندهشة جداً منه وكنت أحتفظ به

فــ أكثر الأماكن آمناً فــ المنزل درجي الخاص وينام طوال الليل بجواري حتى لا يقترب منه أخي الكبير

كم كنت أعشق الزر رقم 5 تقريباً صوت كلب هو هو هو :DD مع صوت فتاة تقول مرحباً

كل حاجة دلوقتي بقت باردة وملهاش طعم تليفوني الخربان ملوش طعم لونه البمباوي وحتى خلفيته لا تدهشني ولا حتى رنت فيروز يا أنا يا أنا ... !

كما أدهشني البلاستيك والورق الملون مع الأصوات المسجله على هاتفي البلاستيكى القديم

من يجد تليفون البابا أوبح مع والله بحبك موت من يحضر لي واحداً له عندي هدية لو بنت تبقا برطمان من النوتيلا ولو والد مممم يبقا نوتيلا برضك :D هع

هممممم أتذكر إنني كنت أول حد جابو وكان كل العيال فــ المدرسة فــ دهشة منه

حتى إنه شغلني عن هاتف أمي المحمول الضخم أبو لاسيلكي الغالي جداً وقتها نوكيا تتألق ...

وفــ الأعياد والمناسبات الخاصة بيكون فــ شنطتي الدائرية أم سوستتين عاملة زي علبة السامنة

مع فستان لا يخلو من ألوان الطيف السابعة وضفرتيني الذهبيتين مع توكتيني السمكة

كم كنت متألقة حينها آه مع شوراب كولن أبيض مزخرف كنت أميرة أبي حقاً وعصفورة والدتي

ياااااااااااااه بقا مع حلوى العيد وأنا أأكل الروب سوس الذى كنت أسميه حينها شعرية حمراء

وأنا أحدث صديقي الخيالي فــ الهاتف أحلى حديث تم التحاور فيه عبر الزمن

هحححححححح الله يرحم

وكنت بكلم مدرسين ولادي فــ التليفون والمصالح الحكومية وأحياناً بعض رؤساء دول العالم

وكنت سفيرة وأميرة وسمكة بحر وكنت حصانة

وكنت دودة بتبقا فراشة وكنت حروف وكنت قطرات مطرة وكنت كل الحجات وكنت داعية إسلامية على فكرة

مممممممم

بالمناسبة دي صحيح أخويا الكبير كان بيقولي إن المطرة بتنزل عشان الملايكة الجميلة بيغسلوا هدومهم وأنا كنت مصدقة لحد وقت قريب على فكرة وكنت بقنع أخويا الصغير بالموضوع ده ... تــباً

آه وكمان إننا نقدر نتكلم مع الأرواح وفـــ ليلة من ليالى سهرنا الطويلة أنا والحوكش أخويا الكبير عملنا بيت من السفنج

ورآينا شبح يلبس أبيض عدى من أمامنا لولا إني رأيته حقاً لقولت خيال الطفولة !!

وعادي أخدنا علقة كل يوم بالسلكة بتاعت بابا عشان محدش صدقنا

مع أصوات ضحكتنا العالية وبعد البكاء قمنا هرباً على صلاة الفجر فــ جوف الليل والكلاب مالية الشوارع نزلت أنا والحوكش نصلى فــ المسجد

وكانت أول مرة بدخل مسجد جميل بالشكل ده وكل حاجة كبيرة وعظيمة وطويلة وخضرا وأسامي ربنا كانت سحراني أوي والشيخ طبطب عليا وإبتسملي بحب صافي لسه فكراك هممممم #تنهيدة

وكنت بشوف ناس كتير بيضا معدين وكنت فكراهم ناس بس لما كبرت برضوا معرفتش الناس الشفافة البيضا دول إيه :D طلعوا مش ناس وبطلت أشوفهوم ربما هم الملائكة إللى بتغسل هدومها فــ السما فبتنزل مطرة !

والدنيا خضرا وأنا لابسه خمار أمي صلينا ورجعنا فــ جوف السواد إلى البيت لنكمل سهرتنا فــ البلكونة لرؤية الصباح ونرمي ماية على العربيات المعدية فى الشارع مع

إقناع الأخ الأكبر ليا إنه يكتشف تليفوني وهيطلع من جواه كنز الكنوز ويقنعني بكل البراهين والدلائل ثم يفتحه بمفك أبي مع سكينة

والمسامير الصغيرة تتناثر ويبوظ التليفون وأبكي وأقوله يا كذاب وبيكون الكنز هو المغناطيس ثم ينزل أبي للشغل فندخل نستخبى نعمل نفسنا نايمين

الحوكش يقوم يكمل سهر ويشاهد برامج الكارتون الصباحية برنامج عروستى السخيف والسنافر وأنا أنام وأصحى فــ حزن شديد على هاتفى المحمول البلاستيكي

وأظل أبكي وأصرخ لماما وأنا عمر ما كان عندي عروسة على فكرة فتدينى أجيب عروسة من محل الألعاب

إللى تحت بيتنا القديم فأنزل بضفرتيني الذهبيتين أجيب أحلى عروسة بسبعة جنية ....

وبعد تدليلها وإعطائها إسم وعمل أحلى فساتين لها ووضع روائح لها يأتي الشيطان الأكبر مخرب البهجة أخويا كبير الحوكش

بيقولي إنها مريضة جداً ولازم نعمل لها عملية فيفتح بطنها وأتاري المشكلة مش فــ البطن دي فــ قلبها فنفتح فمنلاقيش قلب أصلاً

إذاً المشكلة ف رسها بيشيل شعرها بإيده مش نافع إذاً المقص هو الحل وبرضك مافيش حاجة إنتريستينج داخل رأسها إذاً العنين ومهما إجتهد يشيل عنيها تأبي العيون ألا تخرج

فلا يجد ما يخرج به العيون فيبوظ العيون وتبقي لوعبتي العروسة المريمية بايظة :@@

فالبكاء بعد كذباته المتاتلية هو الحل وعلقة حلوة من ماما

أما عن البطوط فخرج منه القطن وتيتا التي أطلقت عليا لقب ماريــة المريمية هــي أصلحت لــي البطوط وحشته بالقطن وبالأبرة وإديله وإوعــا

وكمان كانت دي أول مرة المريمية تتعرف على الكحل وتتكحل بكحل من قروروة إوعا بقا فضية لامعة وبيحرق حرقان يلاااااهوي وبكيت لستو وخلتني أغسل وشي دون جدوى

وحشتيني أوي يا تيتا يا ستو :(( كانت صحبتي المفضلة أنا مكنش عندي أصحاب غيرها

ولما كنت أزعل منها أخبرها قائله : أنا هسيبك وأتجوز

تباً هــي لم تتزوج بس سابتني سابتني لوحدي :(

يلا ما علينا الموبايل مافيهوش كنز كان هو الكنز والعروسة ماكنتش مريضة ومحمود مش دكتور

والملايكة مش بتغسل هدومها وعملية المطرة دي معقدة جداً ومش بنشوف الأرواح مع إني شفتها

وأنا مش فراشة ولا عروسة بحر هما أقنعوني بده

بس أنا مصدقة كل ده وواحشني تليفون البابا أوبح وأنا كنت وما زلت ساحرة وده مش كتير يعرفه بعمل سحر هايل : )

وإبقوا تعالوا زوروني فــ بيتي الإسفنجي حيث الملائكة بتغسل هدومها

معلومة: آه بس عشان مكذبش أنا صحيح عمر ما كان عندي عروسة غير إللى إتعملها عملية وتم تدميرها بس كان عندي كرومبة تلك الفتاة التخينة ومحمود قطع إديها برضك ... وفــ عيد ميلادي ال 19 إتحايلت ع ماما تجبلي عروسة جابت واحدة قطن أسميتها عائشة عشان هي شبه أمــي : )  وهي العروسة الوحيدة التي تم الإحتفاظ بها فــ حالتها الطبيعية .... للأسف

ــــــــــــــــــــــــــــــــــ

ملحوظة إللى هيلاقي تليفون البابا أوبح والله بحبك موت يا حمادة ويجبهولي من أصدقائي الحلوين ليه نوتيلا عندي :)

نسيت أقولكم حـــاجـة تفائلوا بالخير أقسم بالرب الرحمن هتلاقوه ;)

دائرة الحيرة فــ أن تـكون محب !

-بعض ما يرد هنا نقل هنا من بعض الكتب على شوية تفكير عقيم-

إحذر من كل ما تدعي به الرحمن فأنا أقسم لك إنه قريب مجيب دعوه الداع
وأنا ندمانة ع كذا دعــاء ألحيت عليه وتمت الإستجابه عليه 

وإحذر من الدعاء بأن تحتار في مولاك فإنها بداية للجنون وللخسران 
أحب مولاك وأعبده كيفما يطلب الفؤاد أعبد الله كما إرتضا لك .

"يا دليل المتحيرين زدني تحيراً" !! إزاي قولت كدا فــ يوم من الأيام لمجرد إني عايزة أحبه أوي .. وما خدتش بالي إني كنت معاه بالفعل ! 

فأتبع ما قيل فــ الكتب عنه بحاول أكون زيهم بس إللى إكتشفته إنه مهما تدرس عنه وتقرأ عنه وتتحلى بما تحلى به السابقون ..
يجب عليك فــ الحب أن ترتجل، فــ الحب وجب الإرتجال من قلبك إلى الرحمن مباشراً


طب أنا عايزة أحبه بس أنا خايفة يكون مجرد إدعاء بإني بحبه !
طب إزاي أعرف؟ آه إختبار وكده لأ صعب ماقدرش ما أصبرش ما أبصرش .. طب مما حاولت فهمه فيما قرأت أنه وجب ع المحب ترك محبه ما دون المحبوب وعليه عدم الإلتفات يعني إيه ؟
ليس لك حبيب إلا هو لا تلتفت بقلبك ولا عينيك إلا إلى الله فإن إلتفت وعشقت ما سواه فأنت كاذب وحبك إدعاء 
تـــبـــاً شوف بقا إحنا كل كام يوم بنلتفت عن من سواه وبنعشق في حيتنا قد إيه يعني عشق خالص ده بتاعه هو بس له هو بس
 .....

قال إبراهيم بن أدهم :- "غاية همتى ومرادي من الله تعالى أن يجعل لي الميل إليه فلا أرى شيئاً دونه ولا أشتغل بأحد سواه ثم لا أبالي إلى تراب صيرني أم إلى عدم رجعني " 


بيقولك بقا كل هم وذكر لغير الله تعالى فهو حجاب بينك وبين الله .. يادي المصيبة 
حاجة كمان بيقولك إنك لما بتدعي ربنا وتقوله شوف يارب أنا بعصيك قد إيه وإنت مبتعاقبنيش إيش عرفك يا خويا إنه مش بيعاقبك لأ ع فكرة بيعاقبك أقولك أنا إزاي .... فيما قرأت

-حكى أن رجلاً من العباد قال :- " إلهي كم أعصيك ولا تعاقبني فأوحى الله إلى نبي هذا الزمان قل لــه:- ألى كم أعاقبك وأنت لا تدري ألم أحجبك عن لطائف أنسي وألم أخرج عن قلبك حلاوة مناجتي " !!


حسناً أنا فـــ حيرتي البشعة بخصوص هذا الشأن منذ أسبوعين تقريباً وما من هادي إلا الله مع إني سألت ناس كتير نحسبهم عارفين بالله يعنى وقرأت وكل قراءة تزدني حيرة بلا إنتهاء ثم إنتقلت إلى مرحلة حقيرة ربما من الفلسفة 
ثم إلى إنكار كل الحقائق إلا اليقين الوحيد فـــ حياتي  بنفسي الدميمة إذ إنني ربما أحلم لما لا ما يمكن أنا لسه فــ مراحل تكويني فــ بطن الست الوالدة وما كل هذا إلا رؤية لحياتي إللى هأخرج لها ..
المشكلة برضه مش فــ ده فــ داهية كل حاجة هل بقا أنا والناس إللى بندعي حب ربنا ده حب بجد ولا إدعاء وفــ ذلك نستشهد بالسيدة رابعة فــ الموقف ده :-

"حكى أن رابعة كانت فــ طريق مكة فأقبل إليها رجل وقال : يا هذا كلي بكلك مشغول
فقالت : انت كنت صادقاً فكلي لكلك مبذول، إلا أن لي أختاً أحسن مني وهــي وراءك فألتفت الرجل فلطمته رابعة على وجهه وقالت : إليك عني يا بطال إدعيتُ محبتنا ثم نظرت إلى غيرنا رأيتك من بعيد فقلت وجدت عارفاً فلما تكلمت قلت وجدت عاشقاً فلما جربتك وجدتك كاذباً ما رأيت معك صفاوة العارفين ومروءتهم ولا طريقة العاشيقين وصيانتهم ..
فصاح الرجل وجعل التراب على رأسه وقال : أدعيت محبه مخلوق فأعرضت عنه جاءت اللطمة على وجهي فأخاف أن أدعي محبه الخالق فإذا أعرض قلبي أن تكون اللطمة على قلبي " .! 

مممممم أقولكم حاجة طب على الأقل فــ محبه خلق الله ممكن تتأكد من محبتك لهم من خلال التجارب يعني أنا بحب أهلى دون أسباب وتأكد من محبتي كنت خايفة جداً إني أطلع مش مسؤولة أو أتحط ف إختبار أهرب بس ف حادث ما قد وقع لى أنا وصغيري أخي علي كانت هدوسه العربية بس زقيته بدل ما أهرب زي عادتي ف أي حاجة بهرب عشان تدخل فيا لوحدي مع إني شخصية جبانة وضعيفة برضك مافيش مشاكل .. 
أديني إتأكدت من حبي إنه مش إدعاء طب مع الحب الأهم الأسمى ده أي إختبار من ربنا بنفشل فيه ونابي أتأكد إزاي إني بحبه ولا إني صح ولا إني أى حاجة اللهم لا تجعل حبنا لك إدعاء ..

طيب ..

قال يوسف بن الحسين " لما أشتغل قلب مريم بحب أبنها سمعت صوتاً: لما كان سرك صافياً لنا كنا نرزقك ف الشتاء والصيف من غير واسطة ولا شدة ولا عناء فلما مليت سرك عني فلا يأتيك رزقك إلا بشدة وذلك قوله تعالى : ( وهزى إليك بجذع النخلة) .

وفيما قرأت برضك إن ربنا بيغير على عبده المحب له حقاً وإن ما يشغل العبد المحب عن الله المحبوب سوف يعذبه الله به حتى يتركه ويعود ..

مممم الله غيور على المحبين طب سؤال إزاي هتأكد من إني بحبه من غير سبب وإزاي أتأكد إني بحبه أصلاً وحبي مش كذب وإدعاء عشان عايزة منه حاجة أو مرعوبة من عذاب ولا نار ولا طالبه لنعيم ؟

إزاي أحبك أنا دلوقتي وأنا عيزاك إنت من غير ما أعوذ حاجة مع العلم أنا مش بخاف من النار أنا إللى بخاف منه الموت مش ما بعد الموت لأ لأ الموت نفسه ..
حد يجاوبنا يا جودعااان آه مع الأشد حيرة بقا أنا مش عايزة أخاف من ربنا عشان أنا مش خايفه منه بقدر ما أنا خايفة من زعله وإبتعاده أخاف ولا ما أخفش ؟؟

طيب ل بعض أهل المعرفة :- " كلما ظننت أني وجدت فحينئذ فقد وكلما ظننت أنى فقدت فحينئذ وجدت "

فــ غيره الرب ع أحبائه ... ولو نظرت بقلبك إلى غيرنا لكويناه
إن الحق غيور :)))
 خد دي كمان ...... قيل لسيدي المنصور الرباني :- ( بأي شئ يعرف العبد أنه غير محجوب من ربه ؟ قال إذا طلبه ولم يطلب منه وأراده ولم يرد منه وأن لا يختار على إختياره شيئاً وإن إختار له النار ... وكل من ليس فــ قلبه سلطان الهيبه ونار المحبة وأنس الصحبه فهو محجوب .... وقال : كفاك من المعرفة أن تعلم أن الله مطلع عليك وكفاك من العبادة أن تعلم أن الله مستغني عنك وكفاك من المحبة أن تعلم أن حبه سابق على حبك وكفاك من الذكر أن تعلم أن ذكره متقدم على ذكرك ) 

إذاً يا عزيزي كلنا محجوبون عنه .... كلنا محرومون كلنا معذبون بالقطيعة وإزاي برضك هنحبه بعشق كداهون إذا كان حبه سابق

إزاي أحب وإزاي أخاف وهل هو شرط برضك الخوف يعني تباً لي أترككم كي تحتاروا ولا لأ براحتكوا :DD

قال ذو النون : كنت حاجاً فإذا شاب يقول : إلهي قد إجتمع وفدك وأنت أعلم فما أنت صانع بهم ؟ 
فسمعت صوتاً يقول وفدي كثير وطـــلابـــي قــليـــل !
ـــــــــــــــــــــــــــــــــــــــــــــــــــــــــــــــــ

وكم من مذكر لله ناسي لله
وكم من مخوف بالله جرئ على الله 
وكم من داع إلى الله بعيد عن الله
وكم من تال كتاب الله منسلخ من آيات الله .....
ـــــــــــــــــــــــــــــــــــــــــــــــــــــــــــــــــــــــــــــ

قالت رابعة :
يا حبيب القلوب من لي سواك      أرحم اليوم مذنباً قد أتاكا
يا حبيبي وصفوتي ورجائي        كــــذب القـلب إن أحب سواكا
يا أنيسي ومنيتي ومرادي           طال شوقي متى يكون لقاكا ؟
ــــــــــــــــــــــــــــــــــــــــــــــــــــــــــــــــــــــــــــــ
قال إبن الفارض :

زدني بفرطِ الحبِّ فيكَ تحيُّراً                 وارحمْ حشى ً بلظي هواكَ تسعَّراً

وإذا سألتكَ أنْ أراكَ حقيقة ً                  فاسمَحْ، ولا تجعلْ جوابي:لن تَرَى

يا قلبُ!أنتَ وعدتَني في حُبّهمْ                صبراً فحاذرْ أنْ تضيقَ وتضجرا

إنّ الغَرامَ هوَ الحَياة ، فَمُتْ بِهِ              صَبّاً، فحقّكَ أن تَموتَ، وتُعذَرَا

نخاف من النار ولا نحب ربنا ؟

أحب أحكيلكم عن أبويا ..

أبويا إللى بيخاف من ربنا أيما خوف أبويا إللى بدل ما يقولي إعملي لربنا كذا وكذا وكذا عشان يحبك وإنتِ بتحبيه بيقولي إعملي كذا عشان النار هتتحرقي هتتشوي الملايكة شديدة بتنفذ أوامر ربنا بكل صرامة .. أنا لو مكنش عندي قلب يحب كان زماني إفتكرت ربنا خلقنا يعذبنا وإنه مش بيحبني وإنه مجرد إلهه قوي وجبار شرير ..
أخويا الصغير سألني هو ربنا شرير عشان كل حاجة نار نار نار؟ أنا بكره النار سكت قلتله ربنا ده الحب وصلت لدرجة إني قلتله علي سيبك من بابا يا حبيبي بابا بيحب ربنا بس بخوف إحنا بقا هنخاف بس بحب قالى إزاي؟ قلتله :

هنخاف على زعل ربنا مش من نار ربنا بنحبه أوي لدرجة إننا بنعبده عشان بنحبه عشان نقرب وطظ فــ النار وعارف كمان طظ فــ الجنة نار بربنا أجمل من مليون جنة يا علي وجنة من غير ربنا تبقا أسوء جحيم والدنيا دي ممكن تكون جنة يا علي بس لما ربنا يكون فيها حولينا شايفينه فى كل حاجه ..

بابا  أنا بعمل إللى ربنا أمرني بيه مش خوف منك ولا عشان عايزه أرضيك بالمعنى الحرفي ولا خوف من ربنا بالمعنى الوحش لأ بعمل أوامر ربنا عشان خايفة يزعل مني ويبعد عني وأنا مش هستحمل بعده عني كأنها نار بتحرق قلبي بتسود وشي بتكرهني فــ كل حاجة كله بيبقا وهم وكذب وسراب وربي هو اليقين الوحيد فـــ حياتى ..

بابا بطل تقولي كل حاجة أنا خايف مرعوب من ربنا ربنا مش وحش ربنا حبه جبار مش جبار من باب الإنتقام يعني لما حبه بيبعد عننا الحزن بيبقا جبار لهب بيحرق القلب بابا علي أخويا الصغير كان هيكره الدين وربنا بسبب خوف النار وخوف ربنا .. ربنا جميل ربنا ما بيخوفش يا بابا ونار ربنا مابتحرقش إللى قلبه إتملا حب وعشق وهيام فــ الرحمن وعشق سيدنا النبي .

مش إنت قولتلي إن ربنا بيستحي من عباده ، وقولتلي إن إللي بيحب ربنا ومعاه ودايماً بيذكره ربنا بيسخرله الأشياء قبل تسخير البشر ما بالك زبانية النار إللى بتخاف ربنا عشان بتحبه لما يشوفوا قلبي منور بعشق الرحمن والله هيترعبوا مني أنا بعشق ربنا ومش خايفة منه هو مش وحش بس أنا مرعوبه من زعله مني ..

عرف بابا يارب إن الحب هو الحياة وإني بحبك عايشة ويارب قول لبابا مايقولش لعلي كل شوية عن النار ، عارف يارب أنا أقنعط علي إن أنا وهو ندخل النار عادي وإحنا بنطيعك وبنحبك ومدام إنت فـ قلبنا يبقا "يا نار كوني برداً وسلاماً علي إبراهيم ".. وعلى أهل الله المحبين إللي بذكره ناجيين .

وقول لبابا يارب ميقوليش أنا وعلي هتخوشوا النار وكل شوية يقولنا يا فوجار ويقعد يخوفنا

أنا بصلى عشان بحبك ،وبحسن لساني عشان يليق بذكرك وبنضف قلبي عشان يليق بنورك .

نور قلب أبويا بالحب وخوف البعد مش خوف نار و"يا نار كوني برداً وسلاماً على إبراهيم" .. 

ملحوظة يارب : بابا بيقولي لما تقفي قدام ربنا إنتِ وعلي هتقولوله إيه كنت زمان بقول مش عايزة أقابلك عشان هكون مكسوفة أوي منك بس دلوقتى بقول آه هكون مكسوفة طبعاً من حضرتك عشان حبي قليل وضعيف بس عارف يارب هبصلك بكل حب وهسكت وأسمعك  ياه أنا مش مصدقه إني أصلاً أخيراً شيفاك وسمعاك فهسكت وأتأمل بعينى الجديدة إللى إدتهالي "فبصرك اليوم حديد" وأوامرك جوارحي تنفذها ولو يارب صحيح النار هتحرقنى سيبها تحرقنى عشان تطهرني وخلي لي أخويا فــ الجنة بقربك عشان يحكيلى وأنا فــ نار عن حبك مع إني عارفة إن ناري هتكون جنة عشان قلبي فيه ربنا و "يا نار كوني برداً وسلاماً على إبراهيم" .. والعباد المتحيرين ..

عزيزي بابا أحب أقولك طظ فــ النار .. أي نار دي تحرق قلب حب ربنا وعين بكت من إنها عصيته وإيد إتمدت طلبت قرب وغفران؟! فــ "يا نار كوني برداً وسلاماً على إبراهيم"...

دي النار تستحي من قلب فيه عشق الرحمن !

بابا مش القران فيه آيات النعيم الأول وبعدين الجحيم مش كل العلوم قالت علموا ولادكم بالحب الأول والتحفيز وبعدين تقولوا الحاجات الوحشة إللى بتخوف ...

ويا شيوخنا يا إللى داخلين فــ السياسة وعمالين تكفروا وتعملوا وبتاع هو إنتوا مش بتحبوا ربنا ليه؟؟ ومش بتتكسفوا لما بتأمروا الناس بالبر وناسين نفسكوا؟؟ هاااا !!
على فكرة أنا هنزل أوعي الناس وأقولهم إنكم كذابين وأعرف ربنا بالحب

وعلى فكرة بقــاا لو فــ حد لازم يخاف من النار خافوا منها إنتوا الأول عشان ماعتقدش إنكوا بتحبوا ربنا إللى يحب ربنا بيطيعوه عشان الحب وخوف من البُـعـد وعلى فكرة عمر الحب ما كان بالدقن ولا جلابية ولا عمامة ولا حتى خرقة صوف الحب سر والسر فــ القلب فإذا صح السر ظهر على الجوارح

 وونابي كفاية تحريم عشان دي كبيرة من الكبائر تحريم ما أحل الله وتحليل ما حرم الله ... وكفاية نار نار نار والتكفير عمال على بطال هو إللى حرام

عشان لما واحد بيقولها على واحد فعلاً بتقع على أحدهما يعنى لو إللى إنت قلت عليه كافر مطلعش كافر يا عم الدقن والجلابية يبقا بتقع عليك وبتبقا إنت الكافر وده مش من عندي .

وحاجة كمان كفاية عليا بابا الله يكرمكوا أنا عايزة أخويا يطلع أحسن مني وينشأ فــ بيئة كويسة ..

وأحسن دعوة أدعيها ليا ولأبويا وأخويا ولمن يدعي الدين ولكل الناس روحوا ربنا يحبكم فبحب ربنا ليكوا إنتوا هتنورا وهتهتدوا

معرفة ربنا هي إللى بتنجي لو كنا ف قلب النار

و"أف لكم ولما تعبدون من دون الله أفلا تعقلون .. قالوا إحرقوه وأنصروا ألهتكم إن كنتم فاعلين .. قلنا يا نار كوني برداً وسلاماً على إبراهيم " .

أنا مش بفسر بس أنا أقصد إن فــ ناس زى أبويا بتعبد الخوف مش بتعبد ربنا وفــ شيوخ بردو مرعوبة من النار مش من رعب بعُد رب النار وفــ شيوخ وناس بتعبُد المصالح وبتستخدم النار آداه تخويف وشيوخ تدخل بالسياسة بالنار حبوا رب النار خافوا رب النار عشان لما تحرقوا ساعتها وقلبوكوا ماليانه بالهوا وخوف مزيف وهوا وسياسة ومصالح هتعرفوا إن حب رب النار هو إللى كان هينجيكوا وهتندموا على تفويت فرص حب كتيرة أوي الحب يا شيخونا الحب النار تستحي من قلب فيه حب ربنا ....

آه دعوتي للتفاؤل يلا كما قال سيدنا النبي تفائلوا بالخير تجدوه ;)

26 - 9 - 2012
مريم حبيب الله

ربـع سـاعـة مــن الـمــوت...

ربــع ســاعة من إنقــطاع أنفاســها..

ظلت تصرخ  ماما .. ماما إنتِ لسه قلبك بيدق ماما ردي عليا دول قالوا إنك فوقتي ماما أنا إيدي على قلبك سمعاني ؟

وأنا فــ صدمة وقلبي بيترعش أكلم الميتة إللى قلبها بيدق ولا أشد إللى بتنهار ... إيه إللي بيحصلي قلبي بيترعش مع لسانى أنا بتسحب بتسحب بقع أصبح الأن هناك إثنتان فــ عداد الموتى لكنهم ينظرون إلى الميتة الأولى وبيصرخوا ردي يا ماما .. كانت وقعتي الأولى بمثابة وقوع روحى بداخلي مع تلك الرعشة بقلبي..

ورعشة ثانية بلساني وإنقطاع نظري عن الإبصار ظناً منهم إنها صدمتي بمعرفة إنها اللحظات الأخيرة لصديقتى صاحبة الـــ 70 عام

ظلت أبنتها تتحسس جسدها تنظر إلى كل حته زرقة فــ جسمها وشوية وتحركها وتقولها ماما سمعاني وإنتهى وقت الزيارة فى العناااية المركزة دون العلم أن هناك واحدة آخرى سوف تنهار وسوف تنقطع أنفسها ويقف النبض ..

وبدل من أنه بعد سويعات قليلة سوف تصبح هناك ميتة واحدة سوف يصبح هناك اثنتان ..

خرجت .. وروحي بداخلي زي الكورة حينما تقذف من أعلى إلى أسفل ومسائاً جائنا خبر الوفاة ..

ترنحت ولم تعد تحملني أقدامي رغماً عني سقط عيني لا ترى سوى السقف وكأنه لم يعد هناك فــ الحياة سوى السقف والمروحة التي تدور فــ إتجاه واحد الأصوات تحولت لهمس مع ضغط ... الصورة فــ عينى تتحول إلى اللون الأبيض ..

بتدريج بطيء توقف القلب عن النبض .. إنقطع النفس ..

لا أدري ماذا حدث هناك ولكنى شعرت فــ موتتى بقلب بجواري لا يستطيع القفز لإمساك يدي الباردة  كما يفعل الأخرون.. ولكني أثناء موتي رأيت أفكاره عجباً الأن وقـد مُت تريد أن تمنع  موتي بحبك الفقير ..

إضطراب إضطراب شديد ..

ماذا يحدث الأن جسدى كله يهتز إنها ليست رعشة إنه زلزال بدأ من قلبي لينتشر بجسدى كله لا لا أريد العودة لا أريد العودة

أتنقذوني من الموت؟! .. وكأن تلك الأفكار مدت يدها داخل قلبي لتنهض روحي داخلى مرة آخرى فتحت عيني لأجد إن المروحة لم تعد موجودة والسقف العالى البعيد هو الأخر لم يعد هنا إنما هي روؤس كثيرة .. لا آرى رأسك بينهم تقف هناك تنظر كشبح بعين مكسورة عين تنظر إلي أبنتك بقلبك وعين إلى الأرض وأنت بجواري ولكن بيننا أكوان ..

تباً تنقذني من موتي الذي أبحث عنه وتختفي إني أكرهك بقدر ما أكره ذاتي أكرهكم جميعاً بقدر ما أكره ذاتي الدميمة ..

وبعد ربع ساعة من إنقطاع أنفاسي ، إذا بأصوتهم تقول فاقت ....

أنظر الأن إليهم بعين الموتى أبحث عنك إذ أنت بجواري لكن لا يصل إليك سوى نظاراتي وعينك تقول حمداً لله وأنا أتحسر على عودتي ، وعاد الجميع ليبكى بحسرة ع الميتة الأولى ..

وحينما أستعدت قوتي بدأت أضعف شيئاً فشيئاً فأنا لم أرحل معها إلى الحياة التي يسمونها موت .. تذكرت إنها رحلت ولن تعود !

أشم رائحتكِ ف كل مكان ،أشعر بيدكِ على شعري كما عودتينى لأجدك ميتة ، لم يتركونني أحتضنك  ..

جميعكم أصبحتم أموات ف عيني الميته وأصبح هو من أكره بشده بقدر كراهيتى لذاتى ..

وأنتِ لا تفعلى شئ سوى أن تآتى بروحك لتتحسسى شعري وتمسحى دموعي على عودتى إللى حياة الأموات تلك وعلى فراقنا المؤقت حبيبتي ..

الأن فقط بعد أن علمتُ إنكِ قد رحلتِ وعليَ أن أستفيق من صدمتى وأبكي لفراقك إللى المفروض كنا هنمشيه سوا !!! حان موعد الإحتراق ونار بالقلب ليس لها من ماء ..

أأموات نحن أم أنتِ ..... فما يزال إعتقادى بإن أمواتنا هم الأحياء ونحن أموات فــي إنتظار الحياة ....

أيها الموت منذ لقائنا الأول تركت لي عين مليئة بك ويد وقلب مرتعشان .. أتسأل متى تزول الرعشة ؟؟

إنــســـانــيـــة ..

فلسطين سوريا الصومال بورما العراق الشيشان أفغانستان ..
كل دول إحنا نسيناهم .. ونسينا الناس إللى بتتقتل لحد النهاردة منهم نساء أطفال رجال وصبايا وصيبيه ...
ومنهم الجعان مش لاقى يأكل ولا يشرب سواء بمنع الطعام عنهم وتجويعهم أو بطبيعة فقر بلادهم من جفاف إلخ ..


هو إحنا إمتى ناوين ننمى إنسانيتنا متقوليش إستنا نحرر بلادنا الأول .. حريتك فــ تحرير الإنسانية فــ إنك تدافع عن أى بشر بأي ملة وأى لون .. من إمتى كان رئيس عدل هو إللى بيحرر أو بينقذ أى دولة آخرى غير بحراك من شعبه إللى عنده إنسانية وبيعمل ضغط حقيقي ع حكومته بالرغم من فاسدها .. كله مستني رئيس عشان يغير وكأنه بطل خارق هيغير الكون لأ إحنا التغير إللى إحنا عايزين نشوفه 
يعنى أنا وإنت وهى وهما لو عايزيين نشوف تغير إحنا نتغير وننزل نطالب بالتغيير ..
أطفال بتتقتل بترويع فــ سوريا وفلسطين وبورما نساء بينتهك عرضهن رجال بتتعذب شيوخ بيتم تجويعهم وإهانتهم ليه ليه ؟ مش عشان فــ كلاب بيعملوا فيهم كدا عشان إنت ساكت وأنا ساكت وبالتالى لما أنا وإنت نسكت حكومتنا الأنانية هتسكت يبقا مين إللى بيصحى الحكومات ويحركها أنا وإنت المفروض ننزل نضغط ع حكومتنا وحكومتهم ونوريهم إننا معاهم وإننا كتير ..
هتقولى هنعمل إيه آخرتها بنكتب كلمتين وبعدين نقف قدام سفارة وخلاص ...


الناس مش واعية كفاية بمعنى الإنسانية وإن بكرة الدور عليهم وإن فــ أطفال زى أطفالهم بالظبط فــ سوريا قبل ما بيتم قتلهم بيتم ترويعهم بصورة بشعة  واللعب بأجسدهم وجرحهم وإغتصابهم وبعد كل ده بيقتلوهم طب ليه طفل قبل ما يموت يشوف كل العذاب ده ؟؟ وليه يموت أصلاً ؟؟ 
بذمتك مش بتخاف ع ولادك ... يعنى لازم ننزل ونوعى الناس ونفهمهم إننا ع الكرة الأرضية دى مش عايشين لوحدنا والأرض من حقنا كلنا .. وإننا لازم ندافع عن أى إنسان مهما يكون لونه أو إسمه أو شكله أو ديانته عشان هو أخويا الإنسان ..


طيب كمان كتبنا وكنا كتير وإتحركنا ووقفنا قدام السفارات فين الصحفيين والإعلام .. فين رجال الأعمال والمتبرعين فين المؤسسات العادية والمؤسسات الخيرية ؟؟
فين الكاتبين إللى رأيهم بيحرك الناس والرأي العام ؟ لازم نزق الناس دى كلها إنها تتحرك فــ سبيل القضايا الإنسانية 
الناس فــ سوريا وفلسطين وبورما بتموت ...
وأحب أفكركم بالجيزاوى إللى هيتعدم المحامى المصري بالسعودية ..
إتحركوا عشان الجيزاوى كرامته من كرامتك وكرامة الوطن ولا هتسكوتوا زى ما مروة الشربينى إتقتلت ؟؟؟ الجيزاوى ومروة الشربينى عبارة عن وطن ... 


ولا هتسيبوهم زى ما سبتوا العراق وفلسطين ونسيتوا الشيشان ... فاكرين طيب إللى حصل فــ لبنان طب أفغانستان ؟؟
فاكرين كل القتل إللى إتعرضله كل إنسان عربي بره بلاده وخارجها سيبك من كلمه عربى حد فاكل الصومال ؟؟
أطفال بتموت من العطش والجوع وإنتوا بتاكلوا وبتشربوا وبتبحثوا عن الرفاهية بالذمة مش حرام ؟؟؟


نموا إنسانيتكم ده إحنا المفروض مع إهتمامنا بالبشر وحقوقهم وإنسانيتهم وأطفالهم وأكلهم وشربهم بنهتم كمان بالحيوانات زى ما ربنا وصانا ... كونوا بشر نموا إنسانيتكم 
ومتستنوش شئ عشان تبقوا بشر أو إنسان عنده دم .. متستناش حكومتك ولا رئيسك الجديد يعمل حاجة كـــن أنـــت التغير الذى تريد أن تراه فـــ العالم ...
وأى حكومة جتلنا بكل فسادها إحنا نستحقها لأننا سكتنا ع ظلم إخوتنا وكنا دايماً سلبيين فــ إدينا فرصة نبقا صح ونكون بشر ونصلح الكون ...
ـــــــــــــــــــــــــــــــــــــــــــــــــــــــــــــــــ
دى شوية تغريدات (تويتس) أنا كتبتها ع صفحتى ع تويتر بخصوص الموضوع ده ...


قولولى بقا عملتوا إيه فــ ذكرى مروى الشربينى ها كتبتوا كلمتين وخلاص صح طب عملتوا إيه عشان بورما نزلنا مرة قدام السفارة وخلاص طب والجيزاوى ها
إنصوروا إخوانكم كى ينصركم الله .. إخوانكم مش شرط يكون بالملة ولا اللون إخواتكم البشر .. إنصر الإنسان إللى زيك
طب مين فاكر الشيشان ؟؟ ومين فاكر الصومال ؟؟ مين فاكر فلسطين ؟؟ مين فاكر الجيزاوى ؟؟ سوريا .. مروة الشربينى ؟؟ مين فاكر مسلمين بورما ؟؟
إنتوا بتريحوا ضميركم مثلاً بكلمتين تكتبوهوم وواقفة قادم سفارة وبعد كدا خلاص حتى لو مافيش حاجة تقدر تعملها لو إحنا كتير متفقين ع فكرة واحده..
نقدر نعمل كتير .. إنما إنتوا بتريحوا ضمايركم مش أكتر تكتبوا تدوينتين فـ منتهى الجمال وتقفوا مرة قدام سفارة وكان الله بالسر عليم
هو إحنا للدرجة دى مش بشر ولا عندنا إنسانية .. ومتقوليش أحرر بلدى الأول ده من ده دى إنسانية وكلنا بشر بس هو من أعمالنا سلط علينا عشان تسكوتوا
طب سؤال هتعملوا إيه عشان الجيزاوى وبورما والصومال ومروة الشربينى غير الكتابة ؟؟؟
محتاجين أكتر من إننا نفتكرهم وندعلهم لأن إحنا فعلاً لما بنكون كتير متفقين ع قضية واحدة نقدر نعمل حاجة وع رأي المثل تعاطفك واحدة مش كفاية
دى أرواح بشر يا ناس والله بسكوتك فعلاً الدور عليك شوف سبنا فلسطين كام سنة !! هنسيبها تانى طب وسوريا والوصومال وبورما والجيزاوى و غيرهم ..
طب والشيشان مش فارقة معاكم ؟فاكرين إللى حصل فــ العراق طيب طب فاكرين الناس بتتقتل إزاى لحد النهاردة .. هو إنتوا مستنين تتدبحوا إنتوا وعيالكم
حريتك مش فــ تحرير بلدك أو حتى وطنك العربي حريتك فــ التحرر من العنصرية فــ تعريف الوحوش إللى بيدبحونا معنى الإنسانية
يعنى إحنا مستنين نبقا بشر وتبقا عندنا إنسانية لما يجلنا رئيس كويس !! مش لازم نستنا عشان نعمل الصح ع فكرة كن أنت التغير
هى دى مشكلتنا إن العيب مننا ومش معترفين بيه ومستنين إللى يجى يصلح عيوبنا مستنين رئيس عشان يظبط الكون لأ لازم إحنا إللى نبدأ كن أنت التغيير
ليهم حق الفلسطينين ييأسوا مننا وليهم حق الصوماليين يموتوا وليهم حق السوريين يفقدوا الأمل لما إحنا خذلنا كل دول والشيشان كانوا بيجاهدوا
ومروة الشربينى إتقتلت ... ومعملناش حاجة بردو المشكلة مش فــ الحكومة وسلطة إحنا جتلنا حكومة قذرة عشان إحنا سلبيين ف المقام الأول
طب والجيزاوى مستنينه يتعدم ع إيد جهله وبهايم إعدامة إهانة ليك ع فكرة إنت وطنك ... بس صح إنتوا أخدوا ع الإهانة جوه وبرا بس حان الوقت نفوق
بورما يلا سخن الناس يومين وإكتب تويتات ويلا هنروح عند السفارة أحب أقولكم لما رحت الأعداد صغيرة وهى مرة ومحدش راح تانى والناس لسه بتتقتل !!
فلسطين سوريا بورما الصومال ومن قبلهم الشيشان العراق مروة الشربينى ... ويا عالم مصيرك إيه يا جيزاوى !!
كلمة واحــدة معندناش منها ... إنــســــانــــيــــة ... مبتعرفش تكون إنسان غير مع أحبائك وولادك أحب أقولك الدور عليك الناس بتتقتل وإنت بتاكل
الناس جعانة وإنت بتشرب وبتبحث من بعد الثراء ع الرفاهية !!
أطفال ف سوريا قبل ما يتقتلوا بأبشع الطرق بيشوفوا عذاب بشع طب إقتلوهم من غير عذاب لأ عذاب وترويع وإنت بتدخل سينما وبتاكل وبتشرب وبتضحك
والله مقصد إنك تبوز ومتاكلش ومتشربش ومتدخلش سينما إعمل كل ده بس أرجوك حاول تعمل حاجة لأخواتك البشر إللى بيتدبحوا كل يوم صوتك له قيمة
وطنك مش بس بلدك ولا وطنك العربي ولا قارتك وطنك العالم كله أى إنسان مهما يكون لونه أو ديانته أو إسمه إنت مسؤل عن حريته مهما يكون الإختلاف بينك وبين أى بنى آدم مينفعش تسيبه يتقتل بدون وجه حق كفاية دم فــ العالم وكفاية جوع وعطش ساعدوا إخواتكم البشر الباحثين ع حرية وطعام ...


مستنى إيه عشان تبقا إنسان ؟؟ مستنى إيه عشان تلحق روح بتموت أو بتدبح مستنى إيه عشان تشرب صومالى أو تأكل طفل هيموت من الجوع ؟؟ 
طب فين الصحافة والصحفيين ؟؟ فين الناس إللى بتكتب وآرائهم قوية وبتحرك الناس بردو إنتوا أنانيين بتحركونا جوه بس طب وإخوتنا البشر !
صحافة إعلام كاتبين رجال أعمال مؤسسات عادية وخيرية إنتوا مبتتحركوش تساعدوا ليه ؟؟ صح هما مساعدوناش فــ بلدنا أكيد مش هيساعدوا إخوتنا البشر !
لازم نوعى ونوسع دايرة الوعى .. إذا مكانش فيه إنسانية إحنا هنمى الإنسانية ...
سؤال تانى هتسيبوا الجيزاوى يموت زى مروة الشربينى ع فكرة كل واحد منهم بيمثل وطن بحاله .. هتسيبوهم يموتوا زى ما سيبتوا فلسطين وسوريا والعراق والشيشان وبورما والصومال ؟؟؟
شـــويـــة إنــســـانـــيــــة يــرحــمـــكـــم الله ..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
آه حاجة كمان طول ما إنت ساكت داين تدان وأهى الدايرة بتدور علينا كلنا ودوام الحال من المحال أقسم لك الدور علينا .. شئنا أم أبينا الدور علينا ولو بعد حين متسكتش على أى ظلم يقع عليك أو على غيرك دافع عن إخواتك جوه وبراه عن سوريا فلسطين بورما ساعد إخواتك فــ الصومال فــ كل مكان عشان بجد الدور عليك .. إن مكانش عندك إنسانية خاف على نفسك وعلى مستقبل ولادك .. إعمل الخير إللى تقدر تقف بيه قدام ربنا لما يسألك عن إخواتك فــ الأرض هتقوله إيه ؟؟ والدايرة بتدور والدور عليك وعلى أولادك جاى إعمل إللى إنت عايز تشوفه فــ ولادك ... إعمل خير كن إنسان 


أنا مش هعلق ع الصور بس إنتوا شوفوا دول وحاولوا تشوفوا فيها نفسكم وأولادكم ..


الصومال ..

العراق ..

الشيشان ..

بورما ..

فلسطين ..

سوريا..

ليه الناس تموت عشان ملة أو عشان لون بموت عشان أنا سنى أو شيعى بموت عشان أنا ملسم فــ الشيشان بموت عشان عراقى على إيد أمريكى بموت عشان أنا عربي أو فلسطينى أو بموت عشان لابسه حجاب أو بموت عشان أنا شاذ أو بموت عشان أنا مسلم أو مسيحى بموت عشان عايز حرية أو بموت عشان أسباب ملكش دخل فيها مجتش على حريتك مأذتكش بتقتلنى ليه .. وقبل ما تقتلنى بتقتل ولادى وتعذبنى بالطريقة دى ليه ؟؟
مأعمل إللى أنا عايزه مادام مبأذيش غيري دينى ولونى وأفكارى بتخصنى لوحدى ملكش حق تقتلنى مدام مبأذكش ولو أذيتك تعالى نروح للقانون !!
كل قاتل هو إرهابى معدوم الإنسانية الأمريكان والإسرائلين إللى قتلونا إرهابيين
كل عنصري إرهابى وكل متطرف إرهابى سيبونا نعيش سيبونا نتنفس ..
ممممم ربنا مخلقناش ناكل ونشرب ونقضى حاجاتنا .. عشان كمان نقضى حوائج غيرنا من البشر ونحس بيهم ونعمر الأرض .. شوفوا الناس دى هتعرفوا إن مشاكلكم تافهة جداً وملهاش ستين لازمة وإن ربنا خالقك بظروف كويسة عشان بجد تحل المشاكل الحقيقية إللى بدل ما تزرف عليها دموع تزرف دماء ... 



متنسوش الجيزاوى زى ما نسيتوا دكتورة مروة الشربيني ..

هتفائل بالخير إن إحنا لسه فينا إنسانية يارب .....