عصفورى يتحدث عن الفقراء

من أسبوع قررت أستعيد عادتي وهى إنى أرجع أأكل العصافير .... كنت دايماً بأكلهم وجت فترة وبطلت أكلهم ونسيتهم
ونسيت لما كانوا بيزقزاقوا قبل الفجر عشان أصحا أصلى وأأكلهم وأستمتع بسحر وقت الفجر 
جبت أكل للعصافير وحتيطة على جسم التاكيف من بره وقفلت الشباك وبدأت أراقب العصافير وهى بتاكل بهدوء من ورا الشيش

وإذ بــ عصفورى عاد ليتحدث لي .....
فى طريقى اليومى للجامعة ومشاويرى فى الدنيا بعشق أمشى فى طريقى لوحدى بفكر فى ملكوتى الخاص أتحدث مع عصفورى 
إذا بى يومياً أجد الفقراء والجياع والعراه ومن سئموا من مد أيديهم للناس ... من كثرة تحديقى بهم يعتقدون أنى أمقتهم 
بل بالعكس كلما رأيت هؤلاء الجياع والفقراء ممن سكنوا الشوارع والكراتين الفارغة مسكناً لهم 
أمقت نفسى أزدرينى أكرهنى ... 
بقعد أقول لنفسي بكل آلم وحسرة إحنا ليه مبنفكرش يرد عليا عصفورى يقولى عشان أنانيـين حتى فى التفكير طب نفكر فيهم .. بلاش طب نفكر هو إحنا ربنا خلقنا ليه !!
يوم تانى فى المترو أحد الباعة المتجولين يدخل المترو على يديه وهو بلا أرجٌل أعلم أن لهم شيخ منصر كما يدعونه وكلهم عصابات 
بس هو مش ربنا خلقنا عشان الناس دى ! 
كانت معايا صديقتى هبه فإذا إنطلق عصفورى من داخلى بالتحدث مع هبه قائلاً : هبه عارفة ربنا خلقنا ليه ؟ عشان الناس دى تعيش
عشان يختبر ضميرنا فيهم عارفة أنا دخلت ليه القسم إللى أنا فيه عشان أساعد المجتمع وأساعد الناس دى حتى لو مش بتعلم كويس أنا ناوية أشتغل عشانهم .
ــــــــــــــــــــــــــــــــــــ
يوم تانى معدية فى وسط البلد فى منطقة راقية وإذا بشركة مهجورة بيتنزل لها بسلالم وقدامها عتبه صغيرة وإذا برجل عجوز نايم عندها بلا غطاء ويكسو وجه الذباب ..
أد إيه إحنا مشاكلنا تافهة وصغيرة أد إيه إحنا مش حاسين بغيرنا أد إيه ربنا إدانا حياة بنستغلها عشان نفسنا بأنانية 
ثورتنا على فكرة قامت عشان الناس دى !!
والبداية تنمية البني آدمين دول .. البداية من عندهم ..

بقعد أفكر يعنى إيه بنقعد نعيط على مشاكلنا البسيطة بالمقارنة وإحنا مش حاسيين بأم إبنها رضيع بيصرخ ومش لاقيه أكل أد إيه بنكون زعلانين لو مصروفنا نقص جنية ولا إتخصملنا ميه جنيه من المرتب وناسيين إن في ناس بتنام على الرصيف جنب الكلاب والناس دى نسيت يعنى إيه خوف ..

أد إيه فى بنات بتقعد تعيط على المكياج إللى مجبتهوش واللبس الفلانى وفى بنات عشان ساكنين فى الشارع عرضهم بيتهتك يومياً ونفسها مرة تشعر بالأمان !!!
ــــــــــــــــــــــــــــــــــــ
يوم آخر رجل يلبس جلبية مقطعة من كل جهة يبيع المناديل وهو فى سن أبى بل به بعض ملامح أبى 
فكرت أنا وعصفورى قليلاً ثم بكيت كثيراً لو أبويا مكانه كنت هحس بأيه أنا عايزة أكرم أبويا وأريحه وماتعبوش ليه راجل زى ده مش لاقى ياكل ولا لاقى يلبس ولا يأكل ولاده ليه يتهان بالشكل ده وياترى ولاده فين وحاسين بإيه ؟؟؟


ليه يومياً ألاقى أطفال بيصرخوا لأمهاتهم من الجوع ومن العرى إللى هما فيه صايفاً شتائاً ؟؟
ليه يومياً ألاقى ستات ورجالة نايمين فى كراتين ؟؟؟ فى الشوارع 
ليه يومياً ألاقى نساء يبكون ويشتكون إلى الله بصوت عالى وهم يبعون مناديل للمارة ؟؟
ليه إحنا مبقاش عندنا نخوة ولا إحساس بغيرنا ؟
ليه مبنفكرش غير فى نفسنا ؟
ليه مبنتحركش غير لمصالحنا ؟
حتى الثورة خليناها مجموعة من المصالح الثورة للفقراء قبل الأغنياء وميسورى الحال أقسم لكم إن قامت ثورة الجياع حقاً فإنها ناجحة دون أدنى شك الثورة القادمة ثورتهم معندهمش حاجة يخسروها والفقر بالنسبة لهم قمة الرفاهية ......


ثورتهم بجد بتشيل ما تخلى ....
ــــــــــــــــــــــــــــــــــــــ


عارفين إحنا ربنا خلقنا ليه عشان الناس دى عشان نساعدهم نفسياً وإقتصدياً ومن كل النواحى أقسم لكم ممكن من الفقراء دول يطلع لنا مليون برادعى ومليون زويل ومليون طبيب ومليون مهندس مصر أكتر ما فيها الفقراء 
أكثر ما يشغلنى حقاً فى صدق المرشحين الإهتمام بالفقراء ......
ــــــــــــــــــــــــــــــــــــــ
عصفورى أكد لي أننا بحاجة إلى التخلى عن أنانيتنا والنهضة من أسفل الهرم وصولاً إلى القمة :)
ربنا خلقنا عشان بعض مش عشان نفسنا 
مــافـــيش حيــاة إلا عــند غيــرك تعيش فــــ خيره ويعـــيــش فــــ خيـــرك :)


لو بدائنا من تحت يبقا حتماً ماشيـيـن صح كفاية بلد مليانة فقر وجوع وجهل ومرض آسلحة أكثر تدميراً من النووى 
إنهضوا بإنسانيتكم وإهتموا بالإنسان .... دول بشر ولاد آدم إخوتنا 
ــــــــــــــــــــــــــــــــــــــــــ
هذا كل ما آرد أن ينقله عصفورى لكم وتفائلوا بالخير تجدوه ربنا يزود إنسانيتكم ..