(نوت بناتي بس) ..
عزيزتي الفتاة " إللي بيستقفوكي " أي تأخذين ع أسفل رأسك بالكف من جهات متعددة ومختلفة !
تحية " مفوقتيه " وبعـد ...
وش كده يا ست العرايس
عارفة يعني إيه كونك بنت " أنثى " ؟
يعني إنسان كامل بنت يعني إنسان يعني إنتِ مش ناقصة ولا نقصك حاجة فمتخليش حـد يعاملك على
إنك بتاعته علشان إنتِ ناقصك حـاجة ولا إنك ناقصة !!
مش هكلمك عن التحرش ولا عادتنا وتقليدنا السخيفة أنا كا إنسانة فقدت كل إيماني فى عداتنا وتقليدنا السخيفة العقيمة !!
ولا هقولك بوصي لنظره المجتمع ليكي على إنك ناقصة وخربتي على المجتمع الذكوري حياته
ولا حتى هقولك بصي على أبوكي وأخوكي بيعاملوكي إزاي على إنك عار وبنت لازم يوأدوكي بالتراب ولازم تستخبي وتكوني بس إللى هما يقولوه ويقتلوا كل إنسان حر جواكي
ولا هكلمك حتى لو أبوكي راجل عال العال بس هيموت ويخلص منك ويجوزك فى نظره جوازك ده شط نجاته خلص منك ومن عار إنه عنده بنت ومن خوف إنك تعملي حاجة غلط بإعتبار إنك "بنت سازجة " والبنات هبل ياعيني وبيصدقوا أي حاجة ..
مش هكلمك فى ده كله ونفترض إنك عايشة في بيت كويس وناس كويسين بس ناقصك يا ست العرايس فسوة حنان مممم هدوري عليها بره لألأ مش ناقصك ...
تعالي أما أقولك متخليش الولد إللي علقتي أمالك وأحلامك كلها بيه - وده مينفعش- يستغل مشاعرك وإحتياجك ليه إستغلال بحنية عارفاه ده أيوه إللي بتقعدي كتير بينك وبين نفسك تفكري فيه وتقولي لأ مستحيل ده بيحبني ...
مبقولكيش إنه مبيحبكيش بس خليكي ناصحة مش غبية .. ومقفلة عيون قلبك يا ست العرايس
بصي بقا إنتِ وهو إنسان نوعك أنثى وهو ذكر إنتوا الإتنين إنسان
يعني هو ميحقلوش ينقص منك حاجة يا "حبيبته"
يــا فلانة قلتلك متنزليش متلبسيش متحطيش لأ لأ لأ ومين دول كمان متعرفيهومش هيأثروا عليكي " شئ لله" يا شيخنا .. ده على أساس إنها هابلة ؟ وهتتأثر بالناس ... وبعدين إشمعنى إنت بتعرف فلان إللي بيشرب مخدرات وفلانة إللي سمعتها لموأخذة ( ودي حريتهم مقصدش حاجة ) إيه مبيأثروش عليك .
عارف يا وحش إنت إيه إنت من الناس إللي ربنا قال عليهم:- "يأمرون الناس بالبر وينسون أنفسهم" .
بتحبيه صح عايزه تسمعي كلامه ناقشيه متخليهوش يركبك ويعمل نفسه زعلان فتقوليله خلاص حاضر فيقوم يضحك وبسلاسة يبوس إيدك ويقولك ف كلاشية فيلم عربي حمضان " هي دي حببتي " .
بصي مقصدش العلاقة تبقا نار والند بالند وهلس ده كله أقصد كوني إمرأة ناضجة وإكرمي نفسك كوني إمرأة مستقلة عقلك ف رأسك وكلامك نابع من عقلك .
آه ولما حد يقولك إنتِ ناقصة عقل ودين إبقي إشرحيلة ناقصة عقل عشان مشاعرك ماشية في الموضوع بتحسي مش زي معظم أنطااااع مجتمعنا جلنفات ...
ونقص الدين ده ياستي عشان بيجي عليكي فطرة مش بتصلي فيها ...
حاجة كمان الواد الصايع إللي نفسك فيه بيفرح أوي لما بيلاقيكي يا غوتي قطة مغمضة .. مش فاهمة حاجة متفهميش ليه ؟؟؟؟؟؟
يا عني يا أخي هتمثل عليك فوق إنت روخر كلنا بقينا فى وقت لازم نفهم فيه كل حاجة ف الدنيا وكل المعاني ؛
لو هتكلم عن نفسي أيوة مكنتش أحب أعرف كمية أشياء ومعاني عرفتها مؤخراً !!
بس لما عرفتها فرقت فى تعاملاتي من بني البشر ولو الحاجات إللي بمفهومنا البنات متعرفش الحجات دي لأ ساعدتني كتير مع بني المتحرشين وإكتشفت إن كان في واحد صديق كان بيتحرش بيا كلامياً وأنا مكنتش فاهمة إلى أن فهمت ، وواحد تاني كان بيتحرش برضك ومكنتش فاهمة فعلاً إن ده تحرش سواء بقا في سلامه ولا قال يعني بيشرحلي حاجة وإيده لما خبطت ع إيدي كده أنا فهمت !!!.
شوفتي يا ستي بقا مينفعش تبقي قطة مغمضة في المجتمع المضمحل بتاعنا ده عشان لو فهمتي وإنتِ قطة هتفهمي آه بس متأخر ف موقف مش لطيف ...
أخر حاجة محشورة ف زوري ..
كونك بنت يعني إنسان كامل حـــــــــــــر
يعني يحقلك تعملي كل حاجة بحريتك الكاملة زيك زي الولد ...
تقاليدنا لو بتحبيها خدي إللي يصلحلك وإللي مش عاجبنا لازم نغيره إلتزمي بدينك وتعاليمه لكن العادات والتقاليد مش دين لازم تفهمي كده ولازم الحمير يفهموا كده ...
العادات والتقاليد مش دين مش دين مش دين والله العظيم مش دين !!
عايزه أقولك حاجة إنتِ عارفة أنا من حقي أشتم وأعرف أشتم لأ ومؤخراً عرفت معاني كتير للشتائم قل مني في شئ ؟؟ أكيد لأ ...
هل ده يدي حد حق يقول عني إني مش مهذبه ؟؟ لأ طب ما الولاد بيشتموا ليه محدش قال عليهم ناقصين آدب ؟
عارفة لما بتعصب بشتم طبيعي كلنا كده أنا هخبي وأداري طبيعتي ليه ؟!
بس عارفة إيه إللي بيخليني مشتمش عمال على بطال إني بتكسف من سيدنا النبي " إنما بعثت لأتمم مكارم الأخلاق" وعشان لما أقوم أصلي مقابلش ربنا بلسان قذر .. لكني قادرة أشتم زي زيهم بس أنا أكرم وأعلى منهم ...
المهم عشان أنا طولت عليكي إللي بيحبك مش هيقولك إعرفي ومتعرفيش إعملي ومتعمليش مش هيقعد يلعب في مخك بأفكاره وبعدها بوسه ع إيدك مع" يا حببتي أنا خايف عليكي" (يا كوكو) تصدق صدقتك !!..
إللي بيحبك هيقولك تحبي نعمل إيه ... عارفة إللي هيحبك هيحبك من غير سبب ومش عايز منك حاجة بيحبك عشان بيحبك بيحبك زي مانتِ بعيوبك كده ...
ولو بتكتبي مش يقولك إيه الهري إللي بتكتبيه ده إزاي هيديكي فرصة تبقي أحسن منه ؟؟ ولا يبقالك رأي وحواليكي ناس هااا يا (حبيبته )
فتحي عقلك تاكلي حلاوة ...
ومتبزليش نفسك في أي حد عشان لو في جنس أحسن من الرجالة يبقى جنسك (مع إني مبحبش التفريق ولا العنصرية كلنا إنسان كلنا واحد) !! .
لما تلاقي إللي يشاركك وميضحكش عليكي بكلمه -إنتِ غيرهم- (بصوت جورج واسوف :D ( عشان كده عايزك تلبسي كذا أو تقري كذا أو تعملي كذا ومتعرفيش كذا أيوه إنتِ غيرهم عشان بتسمعي كلام ربك وكلام عقلك ...
ربك وعقلك كده يبقا شغلك أوستيك يا حلاوة ...
حاجة كمان لكل واحدة مش قادرة تنسى ولد من النوعيات دي أحب أقولك إتوكسي يا موكوسة
إنتِ بذلتي نفسك أكتر من اللازم وروحي إقرفي من نفسك وإشتميها وفوقي يا عبيطة .
ــــــــــــــــــــــــــــــــــــــــــــــــــــــــــ
وإسمعي أغنية الحج Ne-YO miss independent
http://www.youtube.com/watch?v=X_DXIn2bMfY
وإنزلنا ياعم بأغنية فيروز كرويا وإرمي بره منك كل حاجة تربطك بيه إحنا مش أنصاص .
بيعيه وإشتريكي http://www.youtube.com/watch?v=EMHi-WeevzE
آه أنا كنت هنزل الأغنية الأخيرة وأعمل عليها منشن لكام بنت كده بس خفت يخدوها بيرسونال وبتاع لأ إسمعيها وإحزني بنضافة أغنية مهمة : ) ^_^
إنضجي :*
ــــــــــــــــــــ
ليست هناك تعليقات:
إرسال تعليق