كفر

ده ليل ولا نهار ..

مش يمكن نهار بس نهار إيــه ده إللي مافيهوش شمس !

مش كل نهار لازمله شمس ..

إحنا ليلهم نهارنا ونهارهم ليلنا ..

المكـان : كل حته

الزمـان : كل مرة

يمكن .. يمكن كــان وقتها ليل المعادي ونهار الأبلسه شغل شغل شغل

يمكن كـنا 2009 يـوم من أيام سبتمبر البارد شهر أبلسه يوم حر ويوم خريفي وسعات نسمات باردة تمر فيه ، الساعة قصدك الوقت كــان كل وقت .. أصل الليل كــله ليل مبتفرقش فيه السعات ولا عقارب الساعة ولا عقارب البني أدمين كله ضلمه مليان وحشه وبص على النجوم ..

آه بتسأل عليا ؟!

أنا أنا .. أنا مين ؟!

تفتكر هتفرق تقولك إسمي وهـي بتحكي عني .. طيب قوليله يا ستي بصوتي !!

أنــا أحـمــد شهاب عبدالودود حلو الثلاثي ولا تاخد الرباعي جرجس نخله آه تخيل جدي كـان ميسيحى بس جدى التاني أسلم أنـا بقا تقدر تقول لا ديني ..

آه إنت فاكرني هحكيلك مثلاً على جدي لما غير إسمه من صليب وبقا عبد للودود لأ خالص يمكن مرة تانية أكلمك إنه وقع فى حب سورة سمعها وهو بيشرب قصب وحس إنه إتندهله ، المهم خليك فيا يمكن أكون شبهك شوية ..

ليـا أسم تاني يمكن تعريف أكتر منه إسم : أنــا العاصي فى حضرة الرب .. أنــا النفور والعصيان وكلمة لأ، أنـــا لأ..

أنـــا العاشق لذاتي أنــا إللي جالي الأمر صريح بالسجود ، فأخترقت عيني الطين بينما الجميع فى سكينه السجود .. أنا إللي مسجدتش

زهقت من الرغي طيب أكملك .. أنـــا ســيــد العصيان المحروق بالرفض أنــا مش الشيطـان أنــا أبو الشياطين أنـا سيدكم أنــا إبــلــيــس ..

أحـمـد أو إبليس مش فارقة جـدي نبي جدي مسيحي جـدي ولي درويش مش فارقـة ...

كنت فاكر إن الأصول تفرق مفرقتش ، كنت فاكر إن الصدق بينجي منجاش ، كنت فاكر إن الأحلام لما أتخرج هتتلم وتبطل تتكاثر فى دماغي وقلبي وتتحقق لكن .. لا مبادئ نافعة ولا حق نافع ولا صدق ..

جربت كل المبادئ كل الأخلاق كل الصدق وكل الصوت العالي الرافض للظلم وذل البلد .. جربت كل الإيمان ودرت على كل الدروب بقيت راهب وشيخ وعاشق درويش .. الكفر كـان ملازي ولذتي وكـان كل خوفي ورعبي مبقاش أنا بحريتي إني أتنكر فــ شكل العابد القائم الساجد الذاكر أمام الناس وجوايا أشــهــد بالكفر مليون مرة لأ أنــا إبليس وإبليس مكفرش بيــك يارب أنــا كفرت بمخلوقاتك بالمبادئ بالقيم لفرط غيرتي عليك كفرت !! إبليس مسكين أكلت قلبه الغيرة من آدم وكأن آدم معصوم هأ آدم لما عصاك ساعدته على التوبه "فتلقى آدم من ربه كلمات فتاب عليه" أهو إنت إللي بعتله توبه سهله طب وأنا تاني بتخليني أبقا راضي بالحرق بس يبقا معايا فى القاع !!

يترى كـان آدم صحيح بيحبك ولا إكمنه من طينة ؟

مقدرتش أقول آه مقدرتش أسجـد أنا دايب من فرط عشقي ليك فأعرضت عنك .. الغيرة أكلت قلبي الدقات طالعه بنار إتحول قلبي من دقاته من نور لنار .. وبقيت مخلوق ناري !

أحكيلك إزاي كنت ملاك .. كنت طاوس وأصبحت أبليس المنحوس هأهأ

لذلك قررت أكون إبليس وأنــا مش قادر أكون حد غير ذنوبي إللي جوايا وكفري الباطن همحي مظهر عباداتي ليك إللي بيحمدني عليها الناس إلاك !! هكفر ظاهراً وباطناً هتفرق في إيه إذا كان الباطن نجس عمره ما هيصلح الباطن المشكلة .. المشكلة إني خايف والمشكلة إني بحبك !!

بقيت إبليس زي "محجوب عبدالدايم" "ليكن لي إسوة حسنة في إبليس .. الرمز الكامل للكـمال المطلق هو التمرد الحق .. والكبرياء الحق .. والطموح الحق .. والثورة على جميع المبادئ "

عـارف يا رب أنا بحبك لدرجة إني سعات أحس إني أنا وإنت واحد مش محتاج أرفع راسي للسما وأبصلها عشان أدعيلك سعات كتير أنسى إنى أحمد المسلم وأفتكر جدي أروح الكنيسة أولع شمعة وجنب العدرا أبكي ، وكتير كنت أندم أروح مسجد السلطان حسن أسلم عليك فى المسجد نفس السلام إللي سلمته عليك فى الكنيسة ..

نفس البكاء نفس الدموع من نفس العين إيه إللي فرق رسول ورسول دين ودين ورب واحــد ..

طب ما حضرتك قولت إنك مش هتعمل حاجة بعذابي أحسن أو أسيئ عليا طـب ما تقربني منك !

نفسي أثبت للحاجة الصادقة الوحيدة إللي جوايا إني صح إنك موجود بالرغم من كل شروري من كل جحودي وكُفري ..

يمكن إبليس له فرص إنه يتوب ويرجع يمكن الكبر إللي منع إبليس يحل مكانه تواضع والعشق إللي لوثته الغيرة التي تجعله مُحب وليس مع من أحب تحل محله الثقه والإيمان ..

يمكن زي ما علم آدم الأسماء يعلمني الأسرار فيه أمل لأبليس ينقذ بني البشر من المأزق إللي وقعنا فيه ويسجد ويطيع ويبدل النفور بالقبول والمعاصي بالطاعات وال لأ بال نعم !!

ـــــــــــ

مش مهم كفاني تفكير ربنا بيدي أهله سُـكر طويل اللذة الحمد لله على نعمه السُكر البشري صحيح مش طويل اللذة وبيعمل ترجيع على الصبح ودوخة بس بيسكت الأبلسه إللي في دماغي وبيقضي على الشيخ أحمد وأبونا جرجس والسيد صاحب المبادئ فينك يــا "أمل يدنقل " : "المجد للشيطان الأول الذي قال لأ في وجه من قالوا نعم "

برنس والبرانيس قليلُ هأهأ

العيال ولاد الق*بة إتأخروا ليه الساعة بقت إتنين يا ولاد الحمير ...

*المكان المظلم المقدس في ليل سبتمبر الكئيب مودرن أكادمي المعادي*

أحـمـد : ياض يا عمر يا بن ال*** إتأخرت عليا ليه إحنا أوساخ صحيح بس المواعيد لازم تكون مزبوطة هيرمونا فى جهنم بالديقية يا روح أمك

عمر : على مجبتلك التعميرة يا معلم الدماغ العالية الواد إبن الكلب إبراهيم خلاها حراقة علينا

أحمد : فكك أنا دماغي مهرية رزع أسأله وعايز أتسلطن مفوقش .. فين العيال ولاد ال***

عمر : بعونا وطلعوا الساحل يظبطوا من إمبارح

أحمد : ولاد **** بصحيح ، ده أنا مربي الخُبس دول على إيدي فين أيام الجلاليب البيضا والسبح والمبادئ والأخلاق .. ذلك يوم اللعنة يوم ينسى الشياطين أباهم هأهأهأ

عمر : أحسنت التربية يا كبير .. عايز أقولك ليلتهم فيها نسوان يا أبو الأبلسه

أحمد : فاكر الواد خالد إبن ال*** الواد كان بيقول أعمل أي حاجة إلا النسوان أول ما أخد القفا المحترم جالي قالي إلحقني يا أبونا .. وإديت الخبيث للخبيثة .. أنا إللي بوفق الخُبث مع الخبائس قاعد من غير شيطانه ..

تخيل ياض يا عمر لما نار تبقا قاعدة على نار ،بس إنتً لسه فيك خير للأسف لسه مكتملتش فيك عروق الأبلسه يا حمار لو منك كان زماني معاهم .

عمر : ولع وإدعيلي أتوب عنك ! وأطرش عن زن أمك ..

أحمد : - ينفخ الدخان فى وش عمر ويشرب مما يسكره – فكرك هتكون مستريح عارف الفرق إيه ؟

عمر : إيه

أحمد : بتعبد من الظاهر ومن الباطن شغال حرارة حنين لكل نفس من الجنة الدخانية والبيرة .. طب لو توبت عن كل دول تتوب عن الخبائث إزاي ؟ دي الواحدة منهم لو لابسه إسود وشبه الخيمة بنات الملاعين بنشوفهم مألوظين .. عارف يا عمر أنا خايف أكون إبليس بجد !

عمر : طول ما إنت خايف يبقا مش إنت .. إنت خايف من ربنا .. إلا قولي تفتكر إبليس مع كل بجاحته دي بيخاف من ربنا ؟

أحمد : أنـا مش خايف من ربنا أنا بحبه نفسي أتكلم معاه أسمعه أبطل هروب منه أو عند معاه بالمعاصي عارف أنا ولا يفرق معايا أبطل الهباب إللي بعمله ده لكن نظره واحده منه ...

ولعلمك إبليس خايف مرعوب .. عارف ليه ؟ لو مكنش مرعوب مكنش غوانا نتحرق معاه عايز ونس إبن الملعونة ...

عمر : ميتوبش ويحل علينا كل ده ونرجع للجنه ونشهيص مع الحور

أحمد : حتى لو تاب .. ماهي نفوسنا بنت الوس** موجودة نفس مش أمارة بالسوء هي أهل السوء كله على أصول طب أنا عندي إبليس يفضل يغويني بس نفسي هي إللي تتوب ..

عمر : عارف يا أحمد أنا عايز أتوب زي الواد سعد .. حاله إتغير كان من سنة بس معانا لحد ما البت إللي بيحبها إتجوزت بدل ما يمشي في سكة خالد .. كأنه الحب الحقيقي بيخرم قلبك ويفتح سبيل من كل كسرة على الحب الأشد صدق وأشد عشق .. كنت معاه فى الشارع لو تشوفه وهو بيكلم ربنا تتفزع من جرأته صحيح أنا إبن ستين كلب بس أخاف أتكلم مع ربنا كده ..

بيكلمه وبيقوله : "ندهتلي وخدتها مني عشان تقربني ليك هلبي الندا" ، مشينا لحد الإمام وركبنا للسيدة عيشة عايزين نروح منها للمنيل قالي هنط فى النيل من قدام سينما فاتن حمامة قال إيه هيطهر ..

بس لما نزل السيدة عيشة فضل متنح فى نور المأذنة الأخضر ومبيقولش غير: "عنيا عنيا إنتِ تؤموريني يا ماما" ، وأنا أقوله أمك فى البيت جنب أبوك ..

مشي للمسجد زي النايم وأنادي عليه وأقوله إحنا أنجاس وبوقنا نجس وقلبنا نجس .. ودخل هو وأنا محروم كنت مرعوب ربنا ياخدني وأنا داخل بعند معاه وأنا نجس جوه بيت من بيوته .. سعد من أهل السعد يا أحــمــد أبويا كان دايماً يقولي كل واحد له نصيب من إسمه ..

سعد نجا وإتسعد وإتصلح حاله الدموع غسلته أكتر ما الوضوء غسله ..

عايز أتوب يا أحمد

أحمـد : يعني أستنى أنجرح طب ما إنجرحت مية مرة إديني ولو فرصة واحدة إفتح لي باب واحد أطل عليه منك !

طب أنا إسمي أحمد مخادتش من إسمي نصيبي ليه ؟ إحنا إحنا نظرة واحدة بس هي إللي تحيينا وربنا كريم بس كأنه بعد عنا وقرفان من صوتنا ومن معصينا ..

عارف ياض يا عمر إمتى بحس إني حقير أوي ؟

عمر : إمتى يا حج جرجس ؟

أحمد : لما بدخل الحمام "فضلاتي" ، شوف أد إيه أنا حقير وبعصي ربنا عن عمد وبقوله أيوه أنا أقاصد أعصيك لأ وعندي أمل إنه ينجيني ؟؟

وكل ما أفتكر إني بتكبر على خلق الله وأرفع مناخيري وأرد بقرف وسعات مردش خالص أفتكر نفسي وأنا في عرض الإسهـال وبطني هتنفجر !!

قد إيه أنا حقير !! وبدعي حتى مقام إبليس يمكن يكون أخير ..

عمر : أنا فاهمك أنا كمان بستحقر نفسي أوي لما بكون مع نسوان !!

هو ربنا موجود صحيح ولا إحنا إللي كنا محتاجين وجوده فخلقنا الدين ؟

أحمد : لأ يا عمر متقولش كده أنا متأكد من وجود ربنا في جوايا إحساس مبيكذبش سعات .. سعات بحس بروحي برغم من الوساخة إللي بنشربها والشفايف إللي بندوسها والكذب والخيانات وليالي التوهان بسمعها بتناديلي أتوب وأرجعله !! أنا واثق لو حتى كل الأديان مش صحيحه ربنا موجود بحس بيه فى كل كنيسه وكل مسجد ..

إبليس عارف إن ربنا موجود بس قبل ما يكفر الناس بيقولهم أنا مليش دعوة ..

يمكن ربنا يقبل توبتنا يمكن شايف المسجد إللي جنب الأكاديمية ده كل مرة أقول !! المرة دي هخلص قعدتي الوسخة معاكو وأروحله ما تيجي نجرب هنخسر إيه كـده كـده خسرانين ..

عمر : يمكن بس خليها بكرة نكون مستحميين وفايقين

أحمـد : بكرة حلو ..

ــــــــــــــــــــــ

كل يوم بيبقا بكرة .. وبكرة مبيجيش بكرة .. بكرة بيجي لما تقوم دلوقتي .

16-8-2013