الحلوة بـح

هي حلوة حلوة أوي 
وعارفة قيمة نفسها
عنيها حلوة وبصت بيها على نفسها
هي حلوة .. وقاعدة لوحدها 
عنيها بتستجدي العيون تضحكلها والإيد إللي بتسلم تطبطب
هي حلوة .. عشان يوم ما طلبت طبطبة وودن تسمعلها إتأسفت وحضنت وكانت سامع مش مسموع .. حاضن مش محضون ..
ورجعت تاني لوحدها
هي حلوة .. ﻷ .. هي يقينا مافيش زيها
عنيها فضا ماهوش فاضي
عنيها فيها لمحة م الماضي
والضي آتي
والرمش حساده الأعادي
والحاجب حارس بينادي
يحبك يناديك يعاديك وطول ما بيحبك بيكرهك ..
وطول ما هو محتاجلك مغمض عنيه
هي حلوة .. بس تعبت م الفتفتة
وكل يوم يتاكل منها أكتر م حته
هي حلوة حلوة أوي
هي يقينا مافيش منها
هي خلصت كلها ..
هي حلوة حلوة أوي
مش ف ملامح وشها ..
حلاوتها مش بالشوف ..
ولا ف نظرة خوف ..
ولا القلب إللي بيطيب المحدوف ..
قالت لنفسها إنت حلوة حلوة أوي حضنتها أوي بكت عليها وبكت لها ..
هي حلوة هي خلصت كلها ..
هي كلنا ف المترو والشارع والباص وعند الناصية
هي في عنيك إللي مبتقدرش تترفع لها
غمضت عنيك قبل ما تلمح ضيها مت وسبتها ..
كل يوم تموت الصبح وكل ليل تترد روحك وتروح عندها
وف صحيانك تصحا معاها واحدة أحلى مش أحلى عشان هي حلوة بيك ..
ده عشان هي إللي بتحليك ..
هي حلوة حلوة أوي
هي خلصت هي بح .