فى حب المشاركة

النهاردة الجو بديع بصورة غير ممكنة بشكل مبكي من الجمال الهوا الساقع إلل بيدخل تحس روحك بتتنفس جواك ..
وتجري فيك رقص وزغزغة ..
جريت صليت الفجر وقبل ما الدنيا تنور العصافير بتصلي وتنده على المولى بصوت غُنى ..
أنا وقطتي ع السور .. الجو ده بيفكرني بحاجة يترى إيه ؟! مهما أجتهد للوصول لها مش فاكرة ولكني قربت شوية .. بلكونتي وفى قول آخر فرنده فى الفندق إللي باصص على النيل من الدور التالت نيل الأقصر وصافير بتجري جري ع السحاب ومنطاض ملون بين سحابة قريبة .. وأصابني إللي أصابني وقتها حزن عميق ..
لأن الجو ده ساعتها كنت فيه لوحدي مكنش في الشخص الصح إللي أصحيه يشاركني المنظر البديع ده .. ولك أن تتخيل لما تصحي حد تعبان الساعة خمسة ونص هيعمل فيك إيه لما تقوله قوم بص على السما ولا على الشمس وهي بتتولد هيشلفط وشك !

طااايب بالرغم من كوني شخص إنطوائي وبميل للعزله التامة مع إني أبدو شخص إجتماعي جدا و عسول :D وفى المجمل أنا شخص مغفل وعبيط ما علينا ما علينا .. أنا بعشق المشاركة لدرجة الهوس تقريباً أحكيلكوا ..

ممكن جداً أخرج من حفلة عشان خاليه من حد معين عيزاه هو لوحده يشاركني اللحظه دي آه طبعاً الله يعوض عليا ف تمن التذاكر
ممكن جداً أقفل فيلم عظيم قعدت أستنيته كتير يجي أو حتى أخرج من السينما عشان محدش معايا ..
ممكن أستنى وأشيل رواية جبتها وقريت منها 100 صفحة عشان مستنية حد بعينه يقراها معايا ..
ممكن جداً أسيب مسرحية الناس هتموت عليها وأتبرع بالتيكت لأي حد من الواقفين عشان أتهبب أدخلها مع أصحابي ..

عارف اللحظة إللي بتكون قاعد بتتفرج فيها على فيلم فيه حتة خبث وذكاء كده تكون أنت فهمتها فبتبص للي قاعد جنبك يقوم هو كمان باصصلك بإنه يابن اللزينه أنا كمان فهمت أهي اللحظة دي بالفيلم كله ..
المشاركة إللي هي كمان لما تكون فى الفيلم حتة بتضحك أوي فتقوم خابط إللي جنبك على رجلة وتقوموا ميتين سوا من الضحك طب ونابي إيه فايدة الضحك لو هتضحكه لوحدك ها ها ها ؟؟!

طب عارف لما تبقا فى حفلة وتيجي كلمة من أغنية تلمسك إنت وصاحبك تقوم ماسك إيده وتحط راسك على كتفه وتدمع أو لما تكون أغنيتكوا المفضلة أهي اللحظة دي بالحفلة وبال بيغنوا ..
أصلاً مش بروح الحفالات عشان إللي بيغنوا ما أنا بسمعهم ببلاش فى البيت مش نتانة بس معانديش الشغف إتجاه المغنين أو الكتاب أو الممثلن أي بلا بلا  أنا بروح حسب الناس إللي هتروح أصحابي قرايبي بلا بلا بلا :D
بالمناسبة كان في حفلة لوسط البلد حاولت أستمتع بيها جداً جداً لكن للأسف خرجت أجري عشان هبة مش معايا الكلام ده "شمس النهار هاتجيني هتغني وتصحيني" محتاج هبة ومحتاج كل أحلامنا "مع أول شوق هروق وأشوف حاجات كتير ما شفتش زيها" .. هي فين هبة ؟! آه طيب ما علنا ما علينا !!

عامة أنا بروح السينما فعلياً عشان أنام وكتير مش بنتبه عن عمد للفيلم لو حلو أوي عشان أشاركه مع الحد إللي الله أعلم هيكون مين وإللي أستنيت يكون البست فريندايا ذا وان أند أونلي ولكن ما علينا ما علينا .. أنا مش بدخل السينيما وحيداً شريداً ولكن أحياناً المشاركة مع الصحاب مش بتؤدي الغرض فبنام فعلياً ..

طب عارف ف كام كلمة فى الكتاب إللي بتقراه بيقولك إنت أهو بين السطور حركاتك كلامك معتقداتك وصف شخص بتحبه حاجة بتحبها أو كلام بديع بتقول لنفسك هو إتكتب إزاي إيه الدماغ دي!! ، بتقفل وتحس إحساس عظيم لا يصح معه إلا المشاركة مع الحد إللي هتريح راسك عل كتفه وتسمع الكلمات دي بصوته وتبقا الكلمات أو النص ده تميمتكوا طول العمر سر على صغره عظيم .. وبيبقا إللي كاتب الكتاب ده إللي ممكن يكون مالوش لازمه كاتبكم المفضل .. 

المشاركة شئ عظيم عظيم عظيم هي الذكريات إللي بتخلي الأشخاص يغدوا مميزين ومخصوصين بالنسبة لينا ..
الحياة حلوة طول ما إحنا إتنين ممكن مانكنش قريبين أوي بس لكل شخص مناسبة ومشاركة تليق بالحاجات إللي إنتوا فيها لايقين على بعض وفيكوا من بعض ..
فلكل شخص حاجة معينة بتعملها معاه فلان نشاركة الماتش ، فلانة القهوة الصباحية ، فلان شراء الهدوم ، فلانة الموصلات ، فلان لعب بلايستيشن ، فلانة السينيما ، ماما الكلام عن بابا وبابا الكلام عن ماما أو زمان ، فلان نشاركة مخاوفنا ، فلانة نشاركها أحزانا وهكذا ...
 
فلنتخيل بقا لما نلاقي شخص يكون شبهنا فى كل حاجة أكيد ده نحب نشارك معاه حيتنا كلها شخص بالعمر كله من وجه نظري العقيمة هتكون الحياة أحلى وأكثر إمتاعاً وأكيد هنجادل بعض لما نطهق بس عمرنا ما نزهق .. آه بحب الجدل والمناقشات :S

اللحظة بتاعت الفجر النهاردة كانت عظيمة وزعلت إني مشاركتهاش مع حد غير عبود قطي الصغنطوط وصوت غالية بن علي إللي سحرني صوتها الغجري إبن اللزينة وأنا بكتب الهتش ده والنور بيطلع بالتدريج وهي تقول "يلا نعيش بعيون الليل" إزاي غنتيها أحل من الست ها؟! ..
المهم أدركت إني وعبود متشابهين ف عشق الفجر وتسبيح العصافير عبود عنده فضول طفولي قاتل إتجاه العصافير ونور الصباح بشاركة فى ده .. كل يوم يقعد فى صبر وإندهاش حقيقي بيراقبهم وأنا براقب إندهاشه وما أخدتش بالي غير النهاردة إني بعمل نفس إللي بيعمله هاااااح ..

المشاركة نوع من أنواع الحب .. وحقيقي أخدت بالي وزعلت مني إني فى عزله بقالي كتير وبالرغم من قبح الناس وإنهم بياخدوا منك روحك ويساهموا ف تكسيرها وبيبعدونا عن ربنا وقليل إللي بجد بيساعدك تروحله .. إلا إني مفتقده إني أشارك حياتي مع الناس ..
يتهيألي الحياة متبقاش حياة غير لما نشاركها مع الناس التانين .. متى أصبحت وحيدة كده ؟ ومتى أصبح الفؤاد خالي كده ؟!

ما علينا ما علينا الجو النهاردة حلو شاركوا الجو النهاردة مع حبايبكوا عوضوني عن وحدتي النهاردة بإنكوا تكونوا جنب بعض الحياة قصيرة أوي عشان نعيش بعيد عن إللي بنحبهم ولا نشاركها معاهم .. ولو ما فيش حد شاركوا الجو بكتاب بقطتكوا بكلابكوا بأكله حلوة أو فيلم حلو شوية صلاة شوية تسبيح ..
الحياة قصيرة ساعة وهنصحى نلاقي اللي باقي منها شوية ذكرايات عايزين نشاركها فوق بقا :D
"وهو العمر إيه غير ليلة ؟!" :")