هــرتـلـه ..

طب وبعدين ..

هنفلض أعدين .. مش عارفة

طب مش يمكن تطلعي من الزهق ده بحاجة خير .. أصدك بكل العادات السيئة بداية من النوم واللطف الزايد عن الحد مشاهدة التلفزيون إللي فــ العادي مبتفرجش عليه ..

طب هو إنتِ يعني كنتي بتعملي إيه .. مش متأكدة من كونها حاجة مفيدة ولا لأ تصدقي مكنتش بعمل حاجة

ولا حاجة تتعد كله أصفار ..

ده يا رتني حتى بتكلم ف التليفون ولا حتى بكلم أي حد جنبي ولا معايا .. طب وبعدين !!

متقوليليش وبعدين عشان مفيش بعدين عشان مش عارفة هو إيه إللي بعدين !!

وبعدين كفاية بقا إخرجي من دماغي ليه معنديش حد غيرك أكلمه زهقت منك ومني !!

مش عايزة أفضل محور نفسي بالطريقة دي !! هو إيه أنا مش شمس وعمري ما هكون شمس مفيش شمس مضلمة بقدر ضلامي !!

ولا عايزة أكون كوكب ماشي فــ مدار ولا عايزة أكون نجمة منورة وبعيدة عن الخلايق عايزة أكون من الأقمار صحيح تباع بس تباع كل نور لــيــه لأ صحيح جسم معتم بس بيعكس النور والنور بيتشاف جواه ...

أنا يمكن مجرد فضا فضا واسع ملوش حدود ومضلم ريته كان ضيق ريته كان صغير بس يكون منور ..

لسه بتكلم مع نفسي عن نفسي مافيش فايدة

طب إيه وبعدين .. عايشة ف الماضي وإللي سببه من هري الحاضر ومن تناحتي ف الحاضر إللي بقيت أعيشه من غير تخطيط المستقبل مش نوياله على أي نوايا حسنه ولا حتى زي الزفت ..

طب وبعدين ...

أقفل اللاب إللي مفصول نته وأتخمد عادي يعني هعمل إيه قومي يمكن داوشة دماغك تتهد !!

 ـــــــــــــــــــــــــــ

ذات حديث مع النفس 15-8-2013