يا منجى مــن الــمــهــالـــك ؛؛ تــجــربـــة الــحـــادثـــة

هو أنا مكنتش ناوية أحطها فى المدونة بس الحاجة قالتلى حوطيها :D

  

تجربة الحادثة . . . .

قول الحمد لله مع لعله خيراً :-

ـــــــــــــــــــــــــــــــــــــــــــــــــــــــــــــــــــــــ

أصحا الصبح عادى إحتقان وبرد شديد فمروحش الكلية وألاقى أخويا الصغير مرحش المدرسة عادى

ماما تكلمنى تعاليلى إنتى وأخوكى فى السيدة عائشة عشان نخلص حاجتنا

تمااام ألبس وجويا قلق كدا بس عادى وعلى كل شوية يقول إن رجله بتوجعه ماهتمتش قولت عادى

ركبنا الأوتبيس ونزلنا فى المكان المطلوب يلا بقا نعدى الشارع أووم إيه وإحنا بنعدى الشارع

رجلين على حبك توجعه جداً فيجى الميكروباص على أسرع سرعة يخبطنى خبطة شديدة جداً وقعت الحمد

لله تحت الميكروباص نص تحته ونص براه والحمد لله وقعت على وشى : ) أما عن علي فهو إتخبط

جامد وطار بعيد تأثير الأوزان بردوو هع هع هع
ولا هزنى أى وجع ولا أى تعويرة فيا قد رعبى على أخويا جريت عليه وأنا مكسحة من تحت الميكروباص

هو بيعيط وأنا مصدومة وبعدين زعقت شوية بأى كلام

إتلم الشعب المصرى الجميل جداً حولينا والله كنت عايزة أبوس كل واحد وأدعيله الناس دى حلوة كدا إزاى

كل شوي يجى حد يطبتب علينا ويشربنا ماية ويهدى على إللى عمال يعيط وأنا مليانه تعاوير وبترعش

حتى سواق الميكروباص جدع والله : )

الأحلى كل شوية حد يجى يقولنا إيه عليكوا ندر ولا إيه ويضحك

الأجمل بقا كان فى عمو عامل نظافة والله كنت عايزة أبوسه الراجل كل شوية عايز يعملنا أى حاجة كل شوية يجبلنا ماية ويقعد يضحك معانا ولما شافنى غصب عنى بكيت عشان على صعب عليا قعد يقولى متزعليش وإحنا فضلنا قاعدين كتير على الرصيف مستنين ماما وهو خلال الوقت ده كل شوية يطمن علينا ويجبلنا ماية قلت يمكن عشان إحنا متعورين 

بس جت طنط كدا بعكاز ثلاثى ومش قادرة تمشى أول ما شفها ساب المقشة والكنس وقام يوصلها فاقلت له ربنا يخليك كل يوم تعباك معايا كدا شوف حلاوة المصرين !!

الحمد لله إنى عملت حادثة فخور إنى مصرية 

إللى لاحظته بقا على وهو بيعيط بيقول إيه أنا لسه عامل حادثة الصبح إتصدمت يعنى رجله لما وجعته

فجأة مكانش صدفة دى حادثة بس هو مقاليش : ( وهو كان فى طريقة للمدرسة وداسته عربية ورجع :O

معملتش حاجة غير إنى قاعدته على الرصيف وقعدت جنبه ركبتى بتألمنى جداً وغصب عنى لقتنى بعيط جامد

مع إننا كويسين الحمد لله أنا بس إللى أتعورت وكلمت ماما وجت مخضوضة يا عينى وبابا قلبه حس وأتصل بيقولنا إيه إللى حصل أخوكى عمل حادثة الصبح قلتله وعمل حادثه دلوقتى كمان قال يعدها وأنا معاه : )
ـــــــــــــــــــــــــــــــــــــــــــــــــــ

سيبكوا بقا من الهرى ده كله إيه المستفاد من الكلام ده

كلمتين هما إيه :-

لعله خيراً والحمد لله :

خير خير إزاى أيوة خير أنا كان ممكن جداً أموت والعجلة تفرمنى فرم بس حكمة ربنا إن أبقا نص تحت الميكروباص والنص التانى بره

وأخويا يطير بعيد عشان يفضل كويس كفاية عليه إللى حصل الصبح : )

وإيه كمان خير إن ده حصل فى منطقة شعبية الناس سعدونا وضحكولنا وشربونا وقعدونا : ) لأ وعشان أحب الناس أكتر وأتمسك بشعبنا الجميل ده : )

طب يبقا لما نعرف إنه لعله خيراً نعرف إنه الحمد لله الذى لا يحمد على مكروه سواه

يعنى إيه يعنى مهما يحصلك فى الدنيا قول لعله خيراً ليه عشان ده إختيار ربنا ممكن تشوف الحاجة دى حلوة دلوقتى لكن كمان شوية متعرفش دى خير ولا مش خير ربنا عارف توكل على الله فى عملك وإللى يحصل سواء إنت شايف وحش أو حلو هو الخير وفى الحالتين تقول الحمد لله

وأنا مبسوطة أوى بإللى حصلى النهاردة تأكدت من نظرية لعله خيراً وتأكدت إن الدنيا لسه بخير طول ما فى ناس جدعان فى مصر وكمان إتبسط من نفسى كنت فكرانى لما هقع فى مأزق هكون أنانية بس وأنا متعورة وركبتى ضايعة جريت على أخويا الصغير وقعدت جنبه وأخدته فى حضنى : )

ولما الناس مشيت حضنته وعيطت . . . . . بس بردو هو ده الخير والحمد لله أنا مبسوطة وأهى تعاوير وشوية وهتخف أنا كويسة وعلى الحمد لله كويس بفضل ربنا وهو ده الخير لينا : )

شئ بس تنبهت له إننا لازم نهتم بالمناطق الشعبية أكتر والطرق الطريق مافيهوش رايح وجاى الطريق آخر سبهلله والميكروباصات بتمشى على أعلى سرعة  غير إن فى مسنين بيقفوا كتير جداً على ما يعدوا الشارع ولا فى حتى رصيف يفصل ما بين الطريقين ياريت فيما بعد يا مصر يا جميلة تخلى بالك من الناس إللى عايشين فيكى ومن أهلك المسنين .

وتفائلوا بالخير تجدوه : )

ــــــــــــــــــــــــــــــــــــــــــــــــــــــــ

هى المفروض بتخلص على كدا بس أنا عايزة أضيف حاجة بعد طول إنتظار النتيجة نتيجتى الظهرت النهاردة

ونجحت صافى مع إن الإمتحنات كانت جاية صعبه بس أنا كنت متفائلة وقلت ربنا مش هيضيع تعبى ونجحت الحمد لله

وربنا مش عايز يزعلنى وأنا مكسحة كدا ربنا بسطنى ونجحت 

عرفتوا ليه أيوة عشان تفائلوا بالخير تجدوه :) :) :) إبتسمات أهوووو ;)